9-тӥ куарусёнэ Ижкарын Калыкъёслэн Эшъяськон юртазы егитъёс понна выль инты усьтӥськиз – этноковоркинг.

Таӵе ужрад Президент ӵектосъёсъя фондлэн юрттэмез улсын ортчиз. Ужъюртлэн командаез «Артэ» но мерлыко кичӧлтонъёсъя но этнокультурной дышетонъя центр ӵошен утӥзы 800 сюрс манет коньдон – этноволонтёръёслэсь ёросъёсысь корпуссэс азинтон понна.

Этноковоркинглэн ужез этнокультурной вачекусыпъяськон но йӧскалык кусыпъёсты умоятон улсын асмылкыдчи луонлы, волонёрстволы юрттон понна сӥземын луоз. Волонтёръёс котьку но дасесь луо Элькунамы улӥсь котькудӥз йӧскалыклэн ӵектосъёсызлы но ужъёсызлы юрттыны, соин валче калыкъёс куспын эшъяськонэз утьыны.

Этноковоркинг кылдытон – со ӵектослэн нырысетӥ этапез. Та дышетскон площадка юрттыны кулэ этносъёсын ужась волонтёръёс вискысь но экспертъёс, визьнодасьёс вискысь кусыпъёсты кужмоятыны. Собере этноволонтёръёс нимысьтыз дышетскозы но ужрадъёсы пыриськозы, соосын ужалозы асмылкыдчи, этномедиация, пректъёсын кивалтон но медия удысысь пӧртэм усточиос. Ужлэн йылпумъяськонэз – «#МиӴошен» («#МыВместе») нимо площадка, кудӥз Элькун слётэ волонтёр отрядъёсысь кивалтӥсьёсты люкалоз.

«Удмуртиын егитъёслэн Аразы ми ужмес выльдӥськом но трос йӧскалыкъем егитъёслэн кужмогес луонзылы, мерлыко кичӧлтонъёслы бадӟым саклык висъяськомы, – вераз Юлия Шахтина, Калыкъёслэн Эшъяськон юртсылэн директорез. – Пусйымон со, куке Калыкъёслэн Эшъяськон юртсылэн 15 ар тырмон араз ми усьтӥськомы егитъёслы этноковоркинг, кудӥз асьме этноволонтёръёсмы понна гинэ ӧвӧл, трос калыкъёслэн егитъёссылы пумиськылон, утчан-кылдытон, малпанъёсты улонэ пыӵатон инты луоз».

Йӧскалык-лулчеберетъя огазеяськонъёсысь азьветлӥсьёс асьсэлэн азинсконъёссы сярысь ивортӥзы ини егитъёсын ужан политикая агенствоысь кивалтӥсьлэн воштӥсезлы Максим Файзулинлы но Удмурт Элькунлэн йӧскалык политикая йӧскалык кусыпъёсты умоятон ёзэтысьтыз кивалтӥсезлы Александр Корепановлы, та ужрад Калыкъёслэн эшъяськон Юртсылэн юбилеез пумысен выльдэм интыын ортчиз. «Шунды» огазеяськонысь огмуртъёс нылпиослы удмурт кылэз дышетонъя нимысьтыз сменаос сярысь вераськизы, Ӟуч лулчеберетъя мерлыклэн ёзчиез Евгений Костенко семьялы сӥзем ӝытэз радъян сярысь ивортӥз, нош «Достлуг» нимо азербайджан огазеяськон йӧскалыккуспо КВН лига ортчытыны ӵектӥз.