16–20-тӥ коньывуонэ Ӵыжы-выжы луись финн-угор калыкъёслэсь нуналъёссэс пусъён улсын Ижкарын пӧртэм ужрадъёс ортчытозы.

Валтӥсез ортчоз 19-тӥ коньывуонэ – эктонъёслэн ӝытсы, кудзэ радъялоз Калыкъёслэн Эшъяськон юртазы «Чебеляй» студилэн кивалтӥсез Наталья Чиркова. Творческой огазеяськонысь егит эктӥсьёс шудон амалэн дышетозы Ижкарын улӥсьёсты но Удмуртиысь куноосты финн-угор калыкъёслэн валтӥсь эктонъёссылы. Возьматэмын луозы мари, мордва, коми, карел эктонъёс.

«Чебеляй» – студия, кудӥз удмурт вашкала эктонэз улӟытэ но азинтэ. Наталья Чирковалэн кивалтэмез улсын дышетскисьёс калыктодос но кылос экспедициосы поталляло, нош люкам гожтэмъёссылэсь выль постановкаос дасяло. Дэменлык сюлмаське калык устолык понна, утча калыккылос мерасэз вӧлмытон понна альтернатива амалъёсты.

Озьыен, 19 ар ӵоже «МОСТ» Калыккуспо эктон ӵектос быдэсме вашкала эктонъёсты вӧлмытон удысын, эшшо на дэменлыкъёслэн кивалтӥсьёссылэсь но хореографъёслэсь ӧнерзылэсь ӟечлыксэс умоятон уж мынэ. Трос пол та проектлы Президент ӵектосъя фонд юрттылӥз.

Пусъёмы, ужрадъёслы сӥзем арняез усьтоз бесерман лулчеберетъя адӟытон – ӧжыт лыдъем финн-угор калык, кудӥз вашкала дырысен улӥз но улэ элькунлэн улосвылаз. Экспонатъёс пӧлысь куноос адӟыны быгатозы бесерманъёслэсь йӧскалык дӥсьсэс, улон-вылон арбериоссэс.

Тодэ вайытом, Ӵыжы-выжы луись калыкъёслэсь нуналъёссэс нырысетӥзэ ортчытӥзы Финляндиын 1928-тӥ арын. Удмуртиын таӵе ужрадэз радъязы 2001-тӥ арын.

Ужрадэ регистрироваться кариськыны.