19-21-тӥ коньывуонэ Пермын калыкъёслэн огинзылы сӥзем огъя Росси форум радъяськоз. Азьвыл сямен ик та площадкаын йӧскалык политика удысысь лэчыт но бичатӥсь юанъёс эскериськозы. Татчы Россиысь 70 улосъёсысь 800-лэсь ятыр делегатъёс пыриськозы.

Ужрадэ пыриськисьёс тодматскыны быгатозы ӵектосъёсын но кичӧлтонъёсын, кудъёсыз сӥземын вордӥськем шаерез гажанэз но яратонэз, росси калык асшӧдонэз юнматолы, калык лулчеберетъёсты но анай кылъёсты азинтонлы.

Форум улсын радъяськозы пӧртэм пумо мастер-классъёс но вожвылъяськонъёс. Кылсярысь, йӧскалык политика удысын ужась ӧнерчиослэн вожвылъяськонзы, Россия Федерациысь федерал округъёслэн командаоссылэн вожвылъяськонзы. Озьы ик йӧскалык политика удысын ӵектосъёсты быдэстӥсь мерлыко огазеяськонъёслэн азьветлӥсьёссы куспын ортчем ӵошатсконзылы но видео адӟытонъёсъя «Взгляд на страну» конкурслы йылпумъянъёс лэсьтэмын луозы.

Экспертъёс но тӧрлык ёзэсъёсысь ӧнерчиос калык кусыпъёс удысысь ужпумъёс сярысь, Россиын улӥсь калыкъёслэсь лулчеберетсэс азинтон но та удысын ӵектосъёсты быдэстон сярысь кенешозы.

Со сяна таӵе темаосъя котырес ӝӧкъёс ужалозы: «Россиын улӥсь калыкъёслэсь кылзэс утён но азинтон», «Кӧчись адямиослы дышыны но огазеяськыны юрттон сярысь», «Йӧскалык политика удысысь азинлыко удысэткуспо ужъёс».

Форуме пыриськисьёс тодматскыны быгатозы «Государственная национальная политика: региональный ракурс в ретроспективе» нимо адӟытонэн, кудӥз сӥземын Россиысь йӧскалык политикалэн 100 ар тырмонэзлы.

Ужрадъясьёслэн ивортэмзыя, форуме пыриськисьёс этномедиация курсэз ортчемзы сярысь сертификат басьтозы. Этномедиация – со калык кусыпъёсты радъян удысын тужгес но вылез ӧр, кудӥз сӥземын калыкъёс куспын кылдӥсь ченгешонъёсты волятонлы, ӧвӧлтонлы.

Форуме элькунысьтымы но делегация пыриськоз. Удмурт Элькунысь йӧскалык политикая министрен Л.Н. Бурановаен ӵош Перме мынозы Йӧскалык политикая министерствоысь но Калыкъёслэн эшъяськон юртысьтызы ӧнерчиос, мерлыко огазеяськонъёслэн азьветлӥсьёссы. Соос чаклало тодматыны кылъёсты но калык лулчеберетъёсты утён уысын лэсьтӥськись ужъёсын, йӧскалык политикаез быдэстонын муниципал кылдытэтъёсын чошен ужанэн, егитъёсыз калык лулчеберетэн тодматонлы сӥзем ужрадъёсын, «Этнографияя бадӟым диктант» акцилы йылпумъянъёсын.

Ужрадъясьёс: Йӧскалык ужпумъёсъя федерал агентство, Пермь улослэн губернаторезлэн администрациез.