Куартолэзе Россиысь йӧскалык ужпумъёсъя агентство но «Аргументы и факты» книгапоттон юрт «Куклы в национальных костюмах народов России» нимо Огъя Росси нылпи вожвылъяськон ялӥзы. 5-тӥ инвожое конкурслы йылпумъянъёс лэсьтэмын вал.

Россилэн пӧртэм сэрегъёсысьтыз вуэм ужъёсты эскеризы но дунъязы дӥськутъя тодмо дизайнеръёс, этнографъёс, шоу-бизнесысь кизилиос, нылпи-актёръёс, мунё театрысь ӧнерчиос.

Асьмелэн элькунысьтымы ужрадэ пыриськизы Якшурысь шоръёзо школаысь (Дэри ёрос) дышетскисьёс Куликова Екатерина но Султанахметова Анна. Нылъёслэн «Брангуртысь песянай ӧтчаське» нимо ужзы «Тужгес но устоез йӧскалык дӥсь» номинациын Гран-при басьтӥз. Вормисьёсты сӥё-дано пусъён ужрад ортчоз Мускоын 12-тӥ инвожое, Россилэсь нуналзэ пусъён ужрад улсын.