21-22-тӥ коньывуон толэзе Казаньын «Russian Event Awards-2015» премилэн финалаз ортчиз. Татчы Россилэн 36 улосъёсыз 104 чектосъёсын пыриськизы. Огъя та премиез басьтон понна 2015-тӥ арын Россилэн 69 улосъёсысьтыз 688 ӵектосъёс сётэмын вал.

Вормисьёсты пусйыны лыктӥз Россиысь лулчеберетъя министр В.Р. Мединский: «Валаны луэ малы адямиос кытчы ке но мыно-ветло – соослэн выль мылкыд басьтэмзы потэ. Мынон-ветлонлэн одӥгез валтӥсь мугез – со кыӵе ке но ужрад, учыр. Олимпиадаысен пельняньлы сӥзем юмшанозь. Та преми, кудзэ радъязы туризм удысысь ӧнерчиос, туж кулэлыко луэ, арысь аре пыриськисьёслэн лыдзы йылэ. Та туж бадӟым но туж кулэ уж».

Та дано премиын вормон но палэнысь экспертъёслэн вылӥ дунъетъёссы возьмато фестиваль аслэсьтыз валтӥсь ужпумзэ быдэстэ: удмурт калыклэн лулчеберетэз адямиослы тунсыко, туристъёс дась матысьгес тодматскыны солэн лулчеберетэныз, сиён-юонэныз, юмшанъёсыныз.

Тодады вайытом, Удмурт Элькунысь йӧскалык политикая минстерствоен радъям «Всемирный день пельменя» фестиваль туэ тулыспал толэзе Ижкарын радъяськиз. 2016-тӥ арын Миннац фестивалез паськытгес ортчытыны малпа. Пуштросэз но солэн тунсыкогес но «ческытгес» луоз.

Юанъёстылы валэктонъёс басьтыны луэ таӵе телефонъя: 8 (912) 01-00-465 – Анна Габдуллина, фестивальлэн координаторез.