Ижкарысь Вералэн льӧль малпан-куронэныз шарез йӧскалык политикая министр Выль ар кыз вылысь басьтӥз «Ёлка желаний» нимо ӟечлэсьтон акция улсын.

Нылмурт валъёсын тунсыкъяське но вал вылын ӵошатсконъёсы пыриськемез потэ.

Министр Вераен пумиськиз – соос нылашлэн дышетсконэз но яратоно ужъёсыз сярысь вераськизы. Эдуард Петров вераз, пичи дыръязы соос но вал вылын ворттылыны ярато вылэм. Вера сак кылзӥськиз но юанъёс сётъяз.

Вералэн анай-атаез висись нылзэс йӧнатӥськон понна ини 8 ар талэсь азьло вал вылын ворттылонэ нуллыны кутскизы. Вералэн вордскем дырысеныз висёнэз– ДЦП. Кемалась ӧвӧл солы операция лэсьтӥзы, пыдессэ эмъязы, табере со ачиз ини школае ветлэ. Вералэн бадӟым малпанэз – вуоно удысужзэ валъёсын герӟаны. Та пудо-животъёсын фотосессия – таӵе кузьым солы лэсьтӥз йӧскалык политикая министр.

«Вера валъёсты но соосын герӟаськем арбериосты туж яратэ. Таӵе фотосессия ми понна зэмос кузьым луиз – отчы гужем, нылмылэн вордскем нуналаз, одно ик мыномы», – вераз малпанъёссэ нылашлэн анаез.

Министр ватсаз, Вералэсь туспуктэмъёссэ возьмалоз шуыса.

Тодэ вайытомы, «Ёлка желаний» нимо ӟечлэсьтон акция 2018-тӥ аре ялэмын, арлы быдэ сое умоен лыдъя кунмылэн Президентэз Владимир Путин. Ӵектос Удмуртиын но мыло-кыдо ортчытӥське, отчы пырисько УЭ-лэн Тӧроез Александр Бречалов, Кивалтэтлэн ёзчиосыз, депутатъёс но трос сюлмо адямиос. Элькунын акциез Движение первых огазеяськон но «Единая Россия» партия радъяло.