Удмурт Элькунысь Кун Кенеш но но Башкортостан Элькунысь Курултай ваче ӵош ужан сярысь тупанкыл кинюртӥзы. Сӥё-дано ужрад туннэ Ижкарысь Калыкъёслэн Эшъяськон юртазы ортчиз. Кинюртэмъёссэс пуктӥзы улосвыл парламентъёслэн тӧрооссы Владимир Невоструев но Константин Толкачёв.

Удмурт Элькунысь Кун Кенешлэн Председателез Владимир Невоструев пусйиз, элькунмы Башкортостанэн, Татарстанэн, Пермь но Киров улосвылъёсын бускельёс луо, но бускельёслэн сямен ик кусыпъёс ӟечесь вал но вань шуыса.

Владимир Невоструев тау кариз Башкортостанысь кивалтӥсьёсызлы, Курултайлэн Председателезлы Константин Толкачевлы но депутатъёслы улосвылын лулчеберетэз, анай кылъёсты утён но азинтон понна.

Удмурт Элькунысь Кун Кенешлэн Председателез вераз Башкортостанын тямыс ёросъёсаз, кудъёсаз удмуртъёс уло, школаосын удмурт кылэз дышето, Ижкарын ортчись удмурт кылъя но литературая олимпиадаосы пырисько, Татышлы ёросын Удмурт история но лулчеберетъя центр ужа, удмурт кылын «Ошмес» элькун газет печатлаське, удмурт фольклоръя дэменлыкъёслэн улосвылкуспо фестивальзы радъяське шуыса. Пусйиз на, Удмуртиын 3000-лэсь трос башкиръёс уло шуыса. Соослы арлы быдэ Сабантуй йӧскалык бигер-башкир шулдыръяськон радъяське, Башкортостанысь но дэменлыкъёс пырисько отчы. Ваче ӵош ужан арысь аре паськыта, муроме.

Удмуртиысь Тӧролэн но Кивалтэтлэн Администрацизылэн кивалтӥсез Александр Журавлев Удмурт Элькунлэн Тӧроезлэн Александр Бречаловлэн нимыныз ӟечкылаз ужрадэ люкаськемъёсты.

Тупанкылэз сӥё-дано гожтонын озьы ик вал «Камсьӧр удмуртъёслэн йӧскалык центрзы» Удмурт элькун мерлык огазеяськонлэн тӧроез, «Курай» лулчеберетэз азинтонъя башкир мерлык огазеяськон» мерлык мынэтлэн тӧроез Шагит Ишаев но Калыкъёслэн Эшъяськон юртсылэн директорез Юлия Шахтина.

Удмуртиысь Кун Кенеш но Башкортостанысь Курултай ваче ӵош ужан сярысь тупанкыл гожтон бадӟым луонлык сётоз семья дунлыкъёсты, Удмуртиын но Башкорстостанын улӥсь калыкъёслэсь аспӧртэмлыко лулчеберетъёссэс, кылзэс утьыны, азинтыны, вӧлмытыны.

УЭ-ысь Кун Кенешлэн вотэсбамысьтыз.