«Можем-поможем» ӵектос улсын, кудӥз Калыкъёслэн Эшъяськон юртазы ортче, «Удмуртия – мынам выль доре» («Удмуртия – мой новый дом») семья азбука кылдытэмын. Ӵектос Росмолодёжь грантэз утӥз но йӧскалык политикая министерстволэн юрттэменыз улонэ вӧлме.

Со ужрад пыр нылпиос ӟуч но удмурт кылъёсты, лулчеберетэз, сям-йылолъёсты дышето. Озьы ик мастер-классъёс, ӝӧквыл шудонъёс но пӧртэм ужъёс дасямын, соос юртто пӧртэм калыкъёслэсь кусыпъёссэз валаны.

Ӝыны ар куспын анай-атайёс пӧртэм улон юанъёсъя консультациосы ветлылӥзы, УЭ-ысь йӧскалык политикая министерствоысь, МВД-ысь миграция удысысь, Ижкар Администрациысь Дышетонъя кивалтонниысь ӧнерчиосын пумиськылӥзы.

Та центр улсын азбука кылдытэмын. Соосын 30 семья ини тодматскиз. Азбукалэн пайдалыкез пусъемын, со юрттэ Удмуртиын но быдэс Россиын шонер улыны, улон югдуръёссылы дышыны.

Эшшо одӥг ӵектос, кудӥз мигрантъёслы ӟуч кылэз дышетыны, элькунмылэсь лулчеберетсэ но сям-йылолъёссэ эскерыны юрттоз – нылпиослы но анай-атайёслы занятиос. Соосты Ижкар Администрация но Удмурт муфтият радъяло Азин нимо урамын Соборной мечетьын.