6-тӥ толсуре Ижкарын «Марийцы Удмуртии: история, традиции и современность» научно-практической конференция радъяськиз.

Ужрадэ люкаськиз 100-лэсь уно адями. Удмурт Элькунысь поръёслэн йӧскалык лулчеберетсыя автономиенызы кивалтӥсьсы А.И. Радыгин аслаз докладэныз усьтӥз конференциез. Со сяна пленарной люкетаз чузъяськизы таӵе докладъёс: Татарстан Элькунысь поръёслэн йӧскалык лулчеберетсыя автономиенызы кивалтӥсьсы О. А. Третьяков поръёслэн асваланзылэн азинтиськемез сярысь вераз; Н. И. Шутова, Историяя, кылъя но литературая удмурт институтысь валтӥсь тодосчи, поръёслэн Каракулино ёросысь Быргында гуртысь вӧсяськон арамаоссы сярысь доклад лыдӟиз; Е.В. Попова, Историяя, кылъя но литературая удмурт институтысь валтӥсь тодосчи, Удмуртиысь поръёслэсь историзэс югдытӥз; В. Г. Такпулатов, В. М. Васильев нимо кылъя, литературая но историяя пор институтысь тодосчи, пор калыклэн лулчеберетэз бордын али дыре ужамзы сярысь мадиз; Р.Н. Касимов, Историяя, кылъя но литературая удмурт институтысь тодосчи, Удмурт Элькунысь йӧскалык политикаез быдэстонын мерлыко огазеяськонъёслэн интызы сярысь ивортӥз. Пленарной ёзэтын тодмостэм юанъёсты пыр-почгес эскеризы секциосын. Вань докладъёс «Марийцы Удмуртии: история, традиции и современность» бичетэ пыризы.

Удмурт Элькунысь йӧскалык политикая минстр Л.Н. Буранова вылӥ дунъет сётиз мерлыко огазеяськонъёслэн но тодочиослэн ужзылы. Солэн малпамезъя, поръёслэсь вӧсяськон арамаоссэс эскерон выллем огъя чектосъёс туж кулэлыко луо. Соос луонлык сёто калыклэсь туала улонзэ, азинтӥськонзэ эскерыны.

Конференция радын ик «Символы и образы марийского народа: прошлое, настоящее, будущее» нимо вожвылъяськонын вормисе потэм егит шаерчиосты данъян. Жюри куинь номинациосъя («История одного героя: человек в чреде событий. Мариец в современном мире», «Искусство и литература марийцев», «Народная (традиционная и современная) культура марийцев») тужгес но усто эссеосты бырйиз.

Конференциез радъязы: Удмурт Элькунысь йӧскалык политикая министерство, Калыкъёслэн Эшъяськон юртсы, “Удмурт Элькунысь поръёслэн лулчеберетъя йӧскалык автономизы” улосысь мерлыко огазеяськон, Историяя, кылъя но литературая удмурт институт, Дышетонэз азинтонъя институт, Нылпиослы ватсаса тодо-валан сётонъя элькун центр.