4-тӥ шуркынмонэ Калыкъёслэн огазеяськон нуналазы но Удмуртилэн кунлык басьтэм нуналаз йӧскалыккуспо семьяослэн автопробегзы радъяськоз (0+). Таӵе ужрад элькунын нырысьсэ ортчоз.

Радъясьёс дэмлало машинаосты йӧскалык шӧмо чеберъяны. Валтӥсь куронэз – сюрес правилоосты чакланы. Кун регистраци пусъёсты, тыл сётӥсь фараосты, азьпал укноосты чеберъянъёсын ворсаны уг яра.

Та арез странамылэн Президентэз Владимир Путин Семьялэн арез шуыса ялӥз бере, ужрадэ пыриськыны ӧтисько семьяосын но ӵыжы-выжыосын. Ӟеч мылкыдын пумитамын луозы сыӵе водительёс но пассажиръёс, куке соос йӧскалык дӥсьёсын луизы ке, озьы ик машинаын тупась крезьгур чузъяськиз ке.

Автопробеге пырон понна формаез гожтоно.

Старт луоз 4-тӥ шуркынмонэ 12:00, нош ужрадэ пыриськисьёслы 11:00 часысен ик люкаськыны кулэ ни. Собере соос таӵе маршрутъя мынозы: Орджоникидзе нимо ур. – Ленин нимо ур. – Вормонлы ньыльдон ар нимо урам азьын берлань берытскон – Ленин нимо ур. – Пушкинской ур. – Лихвинцев нимо ур. – Удмуртиысь Кивалтэт Юртлэн парковкаез.

Автопробеглэн финишаз пыриськисьёсты возьмалозы интерактивной шудонъёс, пӧртэм мастер-классъёс, шулдыр йӧскалыккуспо концерт. Яркыт но паймымон машинаос ӵектослэн партнёръёсызлэсь кузьымъёс утозы.