11–13-тӥ инвожое Ижкарын Калыкъёслэн эшъяськон юртазы удмурт кейс-чемпионат ортчоз. Ужрадэз лулчеберет кичӧлтонъёсъя Президентлэн фондэзлэн но Росмолодежь грантлэн юрттэмезъя «АРТЭ» этнокультурной дышетонъя но мерлык кичӧлтонъёсъя центр радъя (ӵектослэн авторез – Дарина Никитина). Солэн азьмугез – ӵектос ужпӧрэз элькунысьтымы школаын дышетскисьёс пӧлын вӧлмытон, удмурт кылэз но лулчеберетэз утён понна, выль туала амалъёсты шедьтон но кылдытон.

Кейс-чемпионат ӵектослэн йылпумъясь ужрадэз луэ. Ар ӵоже школаосысь быръем 10 командалы семинаръёс, мастер-классъёс, деловой шудонъёс, вебинаръёс ортчытэмын, соосын ӵош этнокультурной проект лэсьтонъя ӝӧквыл шудон кылдытэмын.

2023-тӥ ар быдэс Россиын дышетӥсьлы но визьнодасьлы сӥземын бере, ужрадэз радъясьёс пусъё, ӵектос наставничество принципен пыӵамын шуыса. Ваньмыз та юрттоз этнокультура удысысь амалтодос но творческой ужпумъёсты мургес эскерыны, выль проектъёс лэсьтон дыръя огъясь амалъёсты уже кутыны.

Кейс-чемпионат 3 нунал ӵоже вожвылъяськон-шудон амалэн радъяськоз. Котькуд командалы сётэм ӵектос ужпумъёсъя нимысьтыз куронъёсты быдэстоно луоз. Со сяна, соос ӵектоссылэсь практика ласянь пайдаё луэмзэ ӧнерчиослы возьматыны но оскытытыны кулэ .

«Кейс-чемпионатлэн валтӥсь инъетэз – тужгес но умой проектной малпанъёсты шедьтон но вӧлмытон. Озьы ик, Удмуртиысь школа, творческой огазеяськонъёс, удмурт лулчеберет, кыл понна «висисьёс» пӧлын эшлыко кусыпъёс кылдытон», – пусъе Дарина Никитина, ӵектослэн авторез, Шаркан ёросысь, Сосновка школаысь 10-тӥ классын дышетскись.

Вожвылъяськонлэн пумаз вормись командаез дуно кузьымъёсын, озьы ик проектирование удысын быгатонлыкъёсты азинтонъя визьмо кенешъёс сётонэн данъеталозы. Ужрадэ пыриськисьёс озьы ик анай кылэз утёнлы сӥзем этнокультурной практикаосъя нимысьтыз карта лэсьтозы, Удмуртиын школаос куспын герӟетъёс кылдытозы.

Пыр-почгес: https://vk.com/event218646606

Герӟаськоно мурт: Ольга Юрьевна Бывальцева, ӵектослэн менеджерез, тел. +79501784207