19-тӥ шуркынмонэ Тюменьын ортчись этнофорумын «МЫ» Россиякуспо йӧскалык видеороликъёсъя вожвылъяськонлэн йылпумъянъёсыз лэсьтэмын вал. Вожвылъяськон нылпиослы но бадӟымъёслы Россиысь йӧскалык-лулчеберет кылёс(наследие) сярысь дышетон контент кылдытыны юрттэ.

38 вормисьёс но куарасётонъя быръем 10 усточиос данъет-кузьымъёссэс басьтӥзы. Эшшо 17 пыриськисьёс нимысьтыз дипломен пусъемын вал.
2022-тӥ арын вожвылъяськонэ Россиысь 80 улосвылъёсысь 800 заявка вуиз. Видеороликъёслэн авторъёссы таӵе номинациосъя ӵошатскизы: «Чеберлыко/шудон роликъёс», «Анимационной роликъёс», «Видеоклипъёс», «Видеорепортажъёс» но «Документальной роликъёс». Ас мылкыдзыя видео лэсьтӥсьёсты но ӧнерчиосты нимысьтыз экспертъёс дунъязы.

«Видеоклипъёс» номинациын «Любители» категориын 2-тӥ инты басьтӥз Удмурт Элькунысь Евгения Кочина.
Солэн «Нити Рода» нимо видеоклипез дунъясьёслы шуныт мылкыд пыӵатӥз. Видеороликлэн пуштросэз возьматэ удмуртъёс ог-огенызы юн герӟаськемын шуыса. Герӟет – адӟыны луонтэм синьыс, кудӥз шуныт песянай киосысь куболэн питраназ инъяське. Питран – улонлэн пусэз, солэн бергамезъя улон азьлань мынэ.

Евгения Кочиналэн верамезъя, вормисе потон шӧдтэк шорысь луиз. Со вера: «Таӵе кужмо вожвылъяськонэ мон малпамтэ шорысь сюри! Уже шорт-листэ сюремлы мон туж паймемын вал! Макем со шумпотымон но дуно, куке тынэсьтыд тыршемдэ зэмос усточиос дунъяло! Тюмень каре вуэмелэсь но вормисьёсты сӥё-дано пусъёнлэсь умой мылкыд гинэ кылиз!»