27-тӥ толшоре УЭ-лэн Тӧроез Александр Бречалов «Признание» премиен адямиосты пусйиз. Та мерлык премия 2017-тӥ арысен пӧртэм удысъёсын азинсконъёс басьтэм адямиослы сётӥське. Александр Бречалов ачиз данъетаз элькун понна тужгес но тыршись адямиосты.

Нимысьтыз данъетэн пусъемын Ува ёросысь Дедюхинъёслэн семьязы. Династилэн историез XIX дауре ни кутске. Соос котьку тыршыса, ужаса, ог-огзэс гажаса улӥзы.

Династия бадӟым саклык нылпиосты будэтонлы висъя. Пичи дырысенызы соослы вордскем музъемез яратон но выжыосыд понна гажан пыӵатӥзы. Дедюхинъёслэн династиязы туннэ ннуал понна – со 200-лэсь трос адями, кудӥз элькунлэн пӧртэм люкетаз улэ но солэн палэназ. Соос герӟетсэс утьыны тыршо, семьяенызы пумиськыло, архивъёсты, туспуктэмъёсты утьыса возё.

«Бадӟым семьямы но улӥсьёсмы сэрен гуртмы улоз. Ми ум сётэ солы бырыны. Милям трос малпанъёсмы. Ми улӥськомы, шумпотӥськомы, гажаськомы но яратӥськомы вордӥськем музъеммес. Тау бадӟым тӥледлы», – веразы Дедюхинъёс.

Россилэн Азьмуртэныз Владимир Путинэн юнматэм Россиысь калыкъёслэн огъя луэмзылэн араз та выллем семья кусыпъёс нимысьтыз бадӟым интые пото, соос возьмато, огкылысь тупаса улон кутске котькуд корка бордысен но огъя дунлыкъёсын юнматӥське.

«Признание» премия – со мерлык данъет, кудӥз сётӥське соослы, кудъёсыз котькуд нунал тыршо элькунмы понна. Та мерлыко премиен озьы ик  пусъемын спорт, лулчеберет, тазалыкез утён но мукет удысъёсын ӵектосъёсты улонэ пыӵатӥсьёс, кудъёсызлэн тыршемез асьме Удмуртиез азинтыны но юнматыны юрттэ.