«Калыкъёсмы трос, нош кунмы одӥг!» – таӵе лозунген 3–8-тӥ шуркынмонэ тямысетӥез Калыккуспо югдытон акция ортчоз.

«Бадӟым этнографической диктант» – со ӵектос, кудӥз тодматэ асьмеды Россиысь пӧртэм калыкъёслэн лулчеберетэнызы, озьы ик этнокультура сярысь тодон-валанъёсмес дунъя.

Та проект 2016-тӥ арысен кутскиз, Удмуртилэсь ӵектоссэ азьланьтӥзы Россия Федерацилэн вань улосвылъёсыз, асьме кунысь 90 000 адями пыриськиз акцие. 2017-тӥ арын проект калыккуспо луиз. 2020-тӥ арын Россия Федерациысь вань улосвылъёсысьтыз но 123 кунъёсысь 1 742 661 адями диктантэз гожтӥз. Арлы быдэ пыриськисьёслэн лыдзы будэ – кылем арын диктант акцие Россия Федерациысь 89 улосвылъёсысьтыз но 184 кунъёсысь 4 076 000 адями пыриськиз.

Югдытон акцие пыриськыны луоз офлайн яке онлайн амалэн 3–8-тӥ шуркынмонэ. Удмурт Элькунлэн котькуд улосвылъёсаз площадкаос радъяськозы, кудъёсаз диктант гожтыны луоз. Тупась площадка быгатӥськоды бырйыны татысь. Онлайн амалэн тестэз Бадӟым этнографической диктантлэн miretno.ru  официальной вотэсбамаз ортчыны луэ.

Диктант 30 юанлэсь кылдытэмын, тест амалэн ортче. Солэн пуштросэз:

– 20 юан – быдэс Россия понна огкадесь юанъёс;

– 10 юан – Россиысь котькуд улосвыллэн аслаз юанъёсыз.

Оглом 100 балл люканы луэ. Ужез быдэстыны 45 минут сётӥське.

Пыриськисьёслы йылпумъянъёсын сертификатъёс соку ик дасямын луозы. 10-тӥ шуркынмон бере miretno.ru вотэсбамын электрон амалэн сертификат басьтыны луоз. Таяз аре но пыриськисьёс юанъёслэсь шонер валэктонзэс соку ик тодыны быгато, исторической справкаос сётэмын луозы ошмессинъёс вылэ ссылкаосын.

Диктант азьын дэмласькомы тодэ вайыны но тодон-валандэс муромытыны Атыкай музъеммылэсь валтӥсь учыръёссэ, калыкъёслэсь лулчеберет сям-йылолъёссэс, кунлык тодметъёсты.

Эшшо огпол пусъём, ӵектос Удмуртиын кылдытэмын – «Ассамблея народов Удмуртии» мерлыко огазеяськон но УЭ-ысь Йӧскалык политикая министерство кичӧлтэм улсын. Йӧскалык ужъёсъя Федерал агенство ӵектослы бадӟым юрттэт сётӥз, со ик акцилэн валтӥсь радъясез луэ.