Вуись Выль ар азьын Удмуртиысь Этноволонтёръёслэн улосвыл корпуссы но Йӧскалык-лулчеберетъя мерлык огазеяськонъёс 2024-тӥ арлы этнодырпус (этнокалендарь) поттӥзы.

Отчы этнокультура удысъя 50 ужрадъёс пыризы, лыдэ басьтӥськизы «Гербер» удмурт праздник но Пельняньлэн калыккуспо нуналэз, бигер «Сабантуй» но ӟуч «Масленица», Анай кылъёслэн калыккуспо нуналзы, конфессикуспо спартакиадаос улсын вожвылъяськонъёс.

Этнодырпусэз адӟытӥзы Йӧскалык политикая министр бордын ялан ужась кенешонлэн арлы йылпумъян нуналаз.

– Таӵе тунсыко амалэн ми дасямы ужмылэсь эсэпланзэ вуоно арлы, – вераз Удмуртиысь Этноволонтёръёслэн улосвыл корпуссылэн координаторез Роман Серов. – Дырпусын висъям лыдпусъёсты учкыса, этноволонтёръёс тодыны быгатозы, кытын но ку соослэсь юрттэт кулэ луоз. Со сяна, асьме дырпусмы Удмуртиын улӥсь калыклы тодэ вайытоз этнокультура удысъя ортчоно ужрадъёсты, кудъёсаз соос пыриськыны быгатозы. Котькуд баме этноволонтёрлэн пайдалыко визь-кенешез но чек-лист ватсамын.

Этноволонтёръёс – со егитъёс, кудъёсыз пӧртэм калыкъёсын тодматскыны дасесь, Удмурт Элькунысь йӧскалык-лулчеберетъя мерлык огазеяськонъёслы юртто но калыкъёс куспын эшъяськонэз утё но азинто.

– Удмуртиын Егитъёслэн Аразы ми ас ужмес выль кужымен кутскиськом. Трос йӧскалыкъем егитъёслэн ужзылы, пӧртэм мерлыко кичӧлтонъёс понна юрттэт сётонлы бадӟым саклык висъяськом, – пусйиз Калыкъёслэн Эшъяськон юртсылэн директорез Юлия Шахтина. – Удмуртиысь Этноволонтёръёслэн улосвыл корпуссылэн ужез сӥземын этнокультура удысысь асмылкыдчиослы юрттонлы, йӧскалык кусыпъёсты умоятонлы.

Удмуртиысь Этноволонтёръёслэсь улосвыл корпуссэс таяз аре кылдытӥзы Калыкъёслэн Эшъяськон юртсы но «Артэ» этнокультуралы дышетонъя но мерлык кичӧлтонъёсъя центр. Но со корпус ас вормонъёсыз сярысь кепыратэк вераны быгатэ ни. 2023-тӥ аре гужем со ас азинсконэз понна юрттэт басьтӥз Президент ӵектосъя фондлэсь. Нош толсуре та проект «Удмуртиысь Егитъёс» премиен данъетамын вал – «Егитъёсын ужан политикаын тужгес но усто йӧскалык-лулчеберетъя ӵектос» номинациын.