«Ёлка желаний» нимо ӟечлэсьтон акциын УЭ-ысь йӧскалык политикая министр Эдуард Петров бырйиз шар, кудаз Эгра ёросысь Ксения дышетскисьлэн льӧль малпан-куронэз гожтэмын. Солэн «Ижевск-столица оружейного мастерства» экскурсие ветлэмез потэ вылэм.

Эдуард Петров Ксенияен но анаеныз пумиськиз. Нылаш дышетсконын но волонтёр удысын азинсконъёсыз сярысь вераз. Со Движение Первых огазеяськонэ пыриське но «Орлята России» ӵектослэн визьнодасез луэ. Ксениялэн атаез – нимысьтыз ожгар операцие пыриськись.

Экскурсиын нылаш пыр-почгес тодӥз, малы Ижкар пыӵал лэсьтон устолыклэн шоркарез луэ, кыӵе ужпӧръюртъёс туннэ нуналэ странамес утё, со сяна дано пыӵал поттӥсьёслэн нимъёсынызы тодматскиз.

«Кузьымез басьтон мон понна туж шӧдтэк шорысь луиз. Мон трос выльзэ тодӥ, Ижкаре экскурсие ветлыкум», – вераз ас малпанъёссэ нылаш.

«Шумпотӥсько, нылпиосмы Вордскем шаерзылэн историеныз тунсыкъясько шуыса. Малпасько, Ксения та пумиськонмес ноку уз вунэты но со котьку ӟечезлы оскоз», – вераз Эдуард Петров.

Тодэ вайытомы, «Ёлка желаний» нимо ӟечлэсьтон акция 2018-тӥ аре ялэмын, арлы быдэ сое умоен лыдъя кунмылэн Президентэз Владимир Путин. Ӵектосэ УЭ-лэн Тӧроез Александр Бречалов но мыло-кыдо пыриське. Элькунамы акциез Движение первых огазеяськон но «Единая Россия» партия радъяло.