29-тӥ тулыспалэ Калыкъёслэн эшъяськон юртазы ортчиз Удмурт Элькунысь йӧскалык политикая министерстволэн 2023-тӥ арлы йылпумъянъёсызъя но 2024-тӥ арлы дасяно ужрадъёсызъя кенешон.

Ужрадэ пыриськизы Удмурт Элькунысь быдэсъясь ёзэтъёсысь но аскивалтэт ёзэтъёсысь огмуртъёс, министерство бордысь Мерлык кенешысь ёзчиос, йӧскалык-лулчеберетъя мерлык огазеяськонъёслэн председательёссы но конфессиослэн азьветлӥсьёссы. Кенешонэз усьтӥз Кивалтэт Администраци кивалтӥсьлэсь ужзэ быдэсъясь Александр Журавлев:

«2023-тӥ ар понна 300-лэсь трос ужрадъёс ортчытэмын, егитъёслы этноплощадка усьтӥськиз, этноволонтёрлы сӥзем дырпус, «Родина – значит вместе» нылпиослы но бадӟымъёслы Удмуртиын улӥсь калыкъёс сярысь шудон конструктор кылдытэмын. Со сяна, йӧскалык-лулчеберетъя огазеяськонъёс 54 миллион манет утӥзы грант вожвылъяськонъёсын. Ужлэн валтӥсь йылпумъянэз – калыкъёс но конфессиос куспын ӟеч кусып возён. Та бордын йӧскалык политикая министерство, Калыкъёслэн Эшъяськон юртсы но йӧскалык-лулчеберетъя огазеяськонъёс 29 ар ӵоже огинын ужало ни».

Йӧскалык политикая министр Эдуард Петров ӟечкылаз ветеранъёсты но мер улонын асьсэды етӥз возьматэм адямиосты, кудъёсыз удысэз кылдытӥзы но солэсь будэмзэ азинтӥзы. Докладаз министр пусйиз, Удмуртилэн 20 ёросысьтыз 250 егитъёс волонтёр ужъёслы но калыкъёслэн кусып возён инъетъёссылы дышетскизы шуыса. Ӧнерчиос ялан эскеро йӧскалык но вӧсьбур инъет вылын кылдэм экстремизм но ксенофобия удысъёсысь юанъёсты, озьы ик мигрант нылпиослэсь адаптацизэс чаклало.

Элькунын бадӟым чектосъёсы пыриськисьёслэн лыдзы йылэ. Кылсярысь:

– Удмуртиын 32 сюрслэсь трос адями «Бадӟым этнографической диктант»-эз гожтӥз;

– асьме элькунысь, Башкириысь, Пермь но Киров улосвылъёсысь – 3 сюрс адями – калыккылос дэменлыкъёс но калык ӧнеръя кибашлыос Ӟуч лулчеберетъя огазеяськонлэн «Высокий берег» шулдыръяськоназ вуылӥз;

– гуртъёсысь пӧртэм ӧнеръёсъя 2 сюрс удмурт нылкышноос Вань удмуртъёслэн «Удмурт кенеш» мерлыко огазеяськонзылэн «Родина» югдытӥсь марафоназ пыриськизы;

– «Звуки прошлого» Бесерман лулчеберетлэн улӟытонъя центраз 700-лэсь трос адями пыриськиз.

«Аныкай» удмурт семья медиастудия, удмурт кылэз тодӥсь анай-атайёслы курсъёс – ваньмыз та «Куара» огинлыклэн пайдаё ужез. Ар ӵоже соос Вотэсэ 40 пӧртэм видео амалэн ивортодэт поттӥзы. Азьланьтӥське ДАУР ТВ ӵектос – авторъёсыз гуртын улон сярысь 12 материал дасязы. Али таӵе ик нимын радио но ужа.

«2024-тӥ арын асьме программаосмес ми дасялом егитъёслэн куронъёссыя, выль стандартъёслы тупатскылом, патриотизм но волонтёр мылкыдо ӵектосъёсты улонэ вӧлмытонмес азьланьтом. Президент чектосъёсъя фондлэн юрттэмез улсын Калыкъёслэн Эшъяськон юртсылэн проектэз улонэ вӧлмыны кутскоз – этнокультура дышетонъя медиа-лаборатория. Ӵектослэн аспӧртэмлыкез – Удмуртиысь улӥсь калыкъёслэн лулчеберетсы сярысь 30 материал интерактив амалэн кылдытыны», – пусйиз Эдуард Степанов.

Озьы ик 2024-тӥ арлы ужпумъёсынызы тодматӥзы Удмуртиысь муфтий Фаиз-хазрат Мухамедшин, Мерлык палатаысь кышкытлыклэсь утиськонъя комиссилэн председателезлэн воштӥсез Алексей Артемьев, «Вместе» огазеяськонлэн ёзчиез Роман Серов но Калыкъёслэн Эшъяськон юртсылэн директорез Юлия Шахтина.

Йӧскалык политикая министерство но Удмурт кун университет куспын валче ужан сярысь тупанкыл гожтэмын. Эдуард Петров но ректор Галина Мерзлякова ас кинюртэмзэс ужкагазъёсы пуктӥзы.