Удмурт Элькунысь творческой коллективъёс но кырӟасьёс шаерысьтымы пӧртэм калыкъёслэн лулчеберетэнызы «Мы вместе» фестивальын тодматӥзы. Вордӥськем интызэс гажан мылкыдзэс вань лыктэм куноослы пыӵатӥзы.

Пор кылын чебер кырӟаз дышетскись Виктория Шишкина, 80 аресъем Алексей Стерхов аккордеонэн ожгар кырӟанъёслэсь поппури шудӥз. Лайсира Копысова эшъяськон сярысь бигер кырӟанэн тодматӥз, Крымысь бигеръёс сямен дӥсяськыса.

Озьы ик учкисьёс «Азвесь», «Ягдор», «Чильтэр» но «Эшъёс» удмурт ансамбльёслэсь кырӟанъёссэс кылзӥзы. Нина Агаджанян армян крезьгурез быдэстӥз, «Италмас» ансамбльысь Яна Мухаметзянова бигер но ӟуч калык эктонъёсты возьматӥз, «У моей России» кырӟанэз кырӟаз.

Концертэз нуисьёс куноослы Крым мукожлэн (полуостровлэн) историез но узырлыкез сярысь мадизы. Фестивалез Дэри ёросысь «Мирас» бигер лулчеберетъя центрысь ёзчиос шулдыртӥзы калык эктонъёсын но бигер батыръёс сярысь мадёсъёсын.

«Ижкарысь пор огазеяськонмы, пӧртэм ужрадъёсты ортчытъякуз, мукет калыкъёсты но котьку ӧте. Крымлэсь Россие пыремзэ пусйыку, со туж кулэ маке: кырӟан-возьматон пыр сям-йылолъёсын тодматон. Ужрадлэн валтӥсь темаез луиз Крымен огазеяськон но калыкъёслэн эшъяськонзы», – вераз пор огазеяськонлэн кивалтӥсез Николай Ямаков.

Пусйыны кулэ, Удмурт Элькун – трос йӧскалыкъем музъем, отысь диаспораос мыло-кыдо но кичӧлтӥсь луыса уло. Таӵе ужрадъёс калыкъёслэсь сям-йылолъёссэс, аспӧртэмлыксэс утёнлы но азинтонлы ӧръямын. Соос быдэсак тупало «Культура» нацпроектлэн куронъёсызлы, кудӥзлы кутскон сётӥз Россилэн Президентэз Владимир Путин.

Калыкъёслэн Эшъяськон юртсы ивортодэтэзъя