6-тӥ инвожое ӟуч лулчеберетъя «Русский дом» центрын «Общество русской культуры Удмуртской Республики» мерлык огазеяськонлэн отчётно-выборной конференциез радъяськиз. Уката ик пусйымон, та ужрад ӟуч кылэз но Россиын Пушкинэз пусъён нуналэ ортчиз шуыса.

Конференция дыръя йылпумъян докладэныз тодматӥз огазеяськонлэн председателез Виталий Тюльпин. Ёрос ёзэтъёсысь ёзчиос асьсэлэн азинсконъёссы сярысь мадизы.

Огазеяськонлэн валтӥсь ужпумез – со Удмурт Элькунысь улосчиослы валэктыны, шаермы одӥг шуыса, ваньместы огъя дунлыкъёс, сям-йылолъёс, ӟуч лулчеберет но ӟуч кыл герӟало шуыса. Огазеяськонлэн ужамез но тыршемез чотын ӟуч калыклэн сям-йылол дунлыкъёсыз азинтӥсько, лулчеберетъёсты герӟась кусыпъёс эскерисько.

Элькунысьтымы йӧскалык-лулчеберетъя огазеяськонъёслэн ужазы зэмос юрттӥсьсы луэ ӟуч лулчеберетъя «Русский дом» центр. Йӧскалык политика удысын 3 ар ӵоже со зэмос ресурсной центрлы пӧрмиз. Ӵапак татын ортчо пӧртэм йӧскалык ужрадъёс, вожвылъяськонъёс.

Трос аръёс ӵоже ӟуч лулчеберетъя огазеяськон, грант утон понна, пӧртэм вожвылъяськонъёсы пыриськылэ. Тросэз ӵектосъёссы Президентлэн фондысьтыз коньдонэн данъетамын вал. Кылсярысь, «Высокий берег» фестиваль, кудӥз туэ 1-тӥ пӧсьтолэзе Сарапул ёросысь Нечкино черкогуртын ортчоз, кыкетӥ ползэ грант утэ ни.

Татчы пыртыны луоз Д. К. Зеленин нимо калык творчествоя «Окно в небо» калыккуспо фестиваль-вожвылъяськонэз но. Таиз ужрад Президентлэн фондэзлэн юрттэмезъя 2017-тӥ но 2019-тӥ аръёсы радъяськиз.

Озьы ик, висъяны луоно «Сад дружбы народов» йӧскалыккуспо ӵектосэз, кудӥз, этнокультурной ёзлюкетъёсты лыдэ басьтыса, карез умоятонлы сӥземын.

Куараосты лыдъяса-чотаса тодмо луиз, огазеяськонлы председателе нош ик Виталий Тюльпин быръемын. РФ-ысь кун йӧскалык политикалэсь Стратегизэ трос калыкъем Удмуртиын улонэ пыӵатэмез понна, сое ФАДН тау каронэн пусйиз.