Уфаын 26-28-тӥ инвожое Россиысь но Белорусиысь улосвылъёслэн форумзы ортчоз. Ужрадэз 2014-тӥ арысен Россия Федерациысь Федерал Собранилэн Федераци Кенешез но Беларусь Элькунысь Йӧскалык Собранилэн Элькун Кенешез радъяло.

Форумлэн валтӥсь ужпумъёсыз – союзо кунъёс вискын интеграци процессъёсты муромытон, парламент, вузкарон, тодос, дышетон, лулчеберет удысъёсын кусыпъёсты юнматон. Озьы ик ужпӧр герӟетъёсты паськытатон но пайдалыко ӧнеръёсты азинтон.

2022-тӥ арын Гродно карын ортчем IX Форуме пыриськисьёс Башкортостан Элькунысь Тӧролэн Радия Хабировлэн вазиськонэз борды итӥськизы. Со дэмлаз вуоно котырес лыдпусо форумез Уфаын ортчытыны.

Котьку сямен, Форумлэн программаез кык ёзэтъёслы люкиське: ужпӧр но лулчеберет. Южтолэзьысен инвожоозь Уфаын пӧртэм ужрадъёс ортчозы. Кылсярысь, школаен герӟаськем спортлы сӥзем фестиваль, Россиысь но Белорусиысь егитъёслэн форумзы но калык возёсысь азинсконъёсты адӟытон (выставка).

Лулчеберет программа «Славянский базар в Сердце Евразии», «Улица дружбы» фестивальёсын узырмытэмын луоз. Лыктэм куноосты адӟытонъёс, мастер-классъёс, калык ӧнеръёсын юртъер-азбар, озьы ик шулдыр концерт но ческыт сиён-юон возьмалозы. Россиысь но Белорусиысь суредасьёс пленэр-туроме пыриськозы.

Вань мылкыд карисьёсты тунсыко ужрадэ ӧтиськомы!

Форумлэн нимысьтыз сайтэзлэн ивортодэтэзъя.