Эдуард Александрович Тен (3 -тӥ гудырикошкон 1962-тӥ ар – 27-тӥ оштолэзь 2017-тӥ ар)

27-тӥ оштолэзе 2017-тӥ аре улонысь кошкиз Эдуард Александрович Тен, «Удмурт Элькунысь корей йӧскалык лулчеберетъя «Мугунхва» мерлыко огазеяськонлэн кивалтӥсез. Эдуард Александрович вань кужымзэ сётӥз Россия- Корея вынлыко кусыпъёс радъян понна. Солэн кичӧлтэмез но кивалтэмез улсын элькунамы корей йӧскалык шулдыръяськонъёс ортчылӥзы. Кылсярысь, «Сольналь» (Шундыӝужан дырпусъя Выль Ар), «Чхусок» (бакча сиёнъёсты октонлы сӥзем шулдыръяськон). Э.А. Тенлэн тыршеменыз сэрен кылдӥз корей кырӟанъя но эктонъя «Мугунхва» ансамбль, нылпиослы но арлыдоослы корей кылэз дышетонъя арнянунал школа ужаны кутскиз. Эдуард Александровичлэн ужез вылӥ дунъямын кун данъянъёсын.

Удмурт Элькунысь йӧскалык политикая министерствоысь, Калыкъёслэн эшъяськон юртысьтызы ӧнерчиос, мерлыко огазеяськонъёслэн ёзчиоссы Эдуард Александровичлэн ӵыжы-выжыезлы но матысь адямиосызлы юн куректэмзэс верало.

Эдуард Александровичен келяськон ортчоз 29-тӥ оштолэзе 12.00 часэ, «Тихие зори» каргуртын, Парковой ур., 26-тӥ юрт.