Нырысетӥез палэнэ ветлон Пермь улосвылын ортчиз, нош кыкетӥез пумиськон туннэ Киров улосвылын Уни каргуртын радъямын вал.

Вань пыриськисьёслы ӟечкылан кылъёсын вазиськизы Иван Машковцев, Уни муниципал кылдытэт администрацилэн кивалтӥсезлэн воштӥсез, Ирина Никитина, Киров улосвылысь Калыкъёслэн эшъяськон юртсылэн валтӥсь ужъёсызъя директорлэн воштӥсез.

Пленарной заседаниын Удмурт Элькунысь йӧскалык политика ужлэн валтӥсь апектъёсыныз тодматӥз Эдуард Петров министр.

Озьы ик, Эдуард Степанович Киров улосвылысь УЭ-ысь йӧскалык политикая министерствоен ӵош ужась ӧнерчиосты данъян грамотаен пусйиз.

Ужрад тематической секциослэсь кылдэмын вал, отын элькунысьтымы ӧнерчиос мыло-кыдо ужазы:

– Калык эктонъёсты дышетонъя площадка;

– Удмурт егитъёслы сӥзем огазеяськонъёслэн туала ӵектосъёссы;

– «Удмурт Кенеш» огазеяськонлэн площадкаез;

– Удмурт вашкала костюмъёс.

УЭ-ысь Калыкъёслэн эшъяськон юртысьтызы директорлэн воштӥсез Татьяна Федорова вера, котькуд палэнэ ветлонын тематической секциос пӧртэмесь луо. Татьяна Петровна пусъе: «Ми котьку но тыршиськом дасяны сыӵе секциос, кудъёсыз тунсыко луозы лыктэмъёслы. Со сяна, улосвылысь огмуртъёсын азьвылгес кенешиськом, куриськом темаосты, кудъёсын соос тунсыкъясько. Басьтэм ивортодэтъя ни дасяськом секциос».

Площадкаослэн ужамзы бере йылпумъянъёс лэсьтэмын вал. Ужрад Ижкарысь «Чипчирган» ансамбльлэн концертэныз йылпумъяськиз.

Тодэ вайытӥськом, та ужрадъёс Удмурт кыллэн нунанэзлы сӥземын. Вуоно пумиськон Марий-Эл Элькунын ӵуказе ортчоз ни.