Котькуд ар УЭ-ысь йӧскалык политикая министерство ёросъёсын «Миннацлэн нуналэз» ужрад ортчытэ. Туннэ министерствоысь ужасьёс Эдуард Петров министрен Уваысь улосчиосын пумиськизы.

«Ужрад улсын, калыкъёсты министерстволэн уженыз, Кун йӧскалык политикалэн Стратегиезлэн ужпумъёсыныз тодматӥськомы. Дышетон семинаръёс, тематической но проектной секциос ортчытӥськомы, улосчиосын пумиськиськомы. Со сяна, дышетӥсьёслы, завучъёслы, анай-атайёслы терроризмен но экстремизмен нюръяськонъя ивортодэтэн тодматӥськомы», – пусйиз министр.

Ува ёросын пумиськон пайдаё ортчиз.

Пыриськисьёслы ӟечкылан кылъёсын вазиськиз Ува ёрослэн Тӧроез Владимир Головин. Докладаз мерлык, экономика, политика, йӧскалык  удысъёсысь азинсконъёсын но йылпумъянъёсын тодматӥз.

Йӧскалык политикая министр Эдуард Петров Министерстволэн ужез, вуоно ар понна валтӥсь ужпумъёсыз но азьмугъёсыз сярысь вераз.

Дышетон ужъюртъёсысь ӧнерчиослы «Профилактика терроризма и экстремизма в образовательной среде» докладзэ мадиз Удмурт Элькунысь Тӧролэн но Кивалтэтлэн Администрациезлэн терроризмлы пумит ужез радъянъя ёзэтлэн кивалтӥсез Олег Кузнецов.

Коммерциен герӟаськымтэ огазеяськонъёсысь огмуртъёслы «Анализ социально-значимых проектов СОНКО Увинского района» семинар ортчытэмын. Секциез нуиз Лариса Князева, Калыкъёслэн эшъяськон юртысьтызы ужась но та удысъя ӧнерчи.

УЭ-ысь йӧскалык политикая министерствоысь мониторингъя но йӧскалык кусыпъёсты эскеронъя ёзэтэн кивалтӥсь Сергей Огородников муниципал кылдытэтъёсын этносоциальной югдуръёсъя юанъёсты сэрттӥз-пертчиз. Солы юрттӥзы «УЭ-ысь Ува ёрос муниципал округ» муниципал кылдытэтысь мерлык юанъёсъя Тӧролэн воштӥсез Эльвира Астраханцева.

Министр кунмуртъёсын нимысьтыз пумиськон ортчытӥз. Эдуард Степанович улӥсьёсын вераськиз но сюлмаськытӥсь юанъёслы валэктон сётӥз

«Тау кылъёс вераме потэ командаелы но тӥледлы, гажано улосчиос, ужрадэ мылысь-кыдысь пыриськемды, трос калыкъем Удмуртиын эшъяськонлэсь кулэлыксэ валамды понна», – йылтӥз Эдуард Петров

Вуоно «Миннацлэн нуналэз» ужрад оштолэзе Дэбес ёросын ортчоз.