24-тӥ куартолэзе Калыкъёслэн Эшъяськон юртазы егитъёслэн трос йӧслыко «Вместе» дышетон центрзылэн ньылетӥ улосвылкуспо сессиез ужзэ мытӥз.

Ужрадэ Россилэн 10 улосъёсысьтыз мерлыко огазеяськонъёслэн ёзчиоссы, калыкъёслэн эшъяськон юртъёссылэн но йӧскалык центръёслэн ӧнерчиоссы пырисько.

Тодады вайытомы, «Вместе» ӵектос улонэ пыӵатыны кутскемын 2016-тӥ арысен. Валтӥсь ужпумез солэн – егитъёслэсь йӧскалык кусыпъёслы сӥзем кичӧлтонъёссэс улонэ пыӵатон вылысь площадка кылдытон. Егитъёс йӧскалык кусыпъёсты радъян, экстремизмен нюръяськон, ӵектосъёсын кивалтон но соосты калык пӧлы вӧлмытон сярысь лекциос кылзозы, ӵектосъёсты азинлыко быдэстонлы сӥзем мастер-классъёсы, практической занятиосы пыриськозы.

Сессия люкемын луоз куинь люкетлы:

— Коммуникативно-дискуссионной. Та люкетэ федерал экспертъёслэн йӧскалык кусыпъёс удысысь ӟырдыт юанъёслы сӥзем лекциоссы пыртэмын.

— Дышетон. Таиз люкетын егитъёс дышетскозы мерлыко ӵектосъёс кылдытъяны, соосын кивалтыны, азинтыны соосыз.

– Шутэтскон. Улосъёсысь йӧскалыккуспо ӵектосъёсын но кичӧлтонъёсын тодматскон, пӧртэм калыкъёслэн лулчеберетэнызы тодматонлы сӥзем ужрадъёсы пыриськон.

Ужрадъясьёс: Удмурт Элькунысь егитъёслэн мерлыко огазеяськонъёссылэн «Вместе» ассоциацизы, Калыкъёслэн Эшъяськон юртсы, Удмурт Элькунысь йӧскалык политикая министерство Россиысь йӧскалык ужпумъёсъя агентстволэн юрттэмезъя.