26-тӥ толшоре Лулчеберетъя но устолыкъёсъя Анаш черкогуртысь центрын «Роль национально-культурных объединений района в вопросах регулирования межнационального диалога и профилактике экстремизма на территории МО «Алнашский район» нимо семинар радъяськиз. Ужрадэ пыриськизы мерлыко огазеяськонъёслэн азьветлӥсьёссы, лулчеберет удысысь ӧнерчиос, эрикрадэз утись ёзэслэн ӧнерчиосыз, ёрос школаосысь визьнодан уж понна кылкутӥсь дышетӥсьёс.

Люкаськемъёс азьын доклад лыдӟизы Удмурт Элькунысь йӧскалык политикая министр Л.Н. Буранова, Йӧскалык политикая министрлэн воштӥсез Л.Ю. Соковикова, Калыкъёслэн Эшъяськон юртсылэн кивалтӥсез Т.П. Боталова, Мер кышкыттэмлыкъя Удмурт Элькунысь кенешлэн секретарез А.В. Ярославцев. Веранъёсазы чузъяськизы Россия Федерацилэн йӧскалык политикая стратегиезлэн валтӥсь валэктэтъёсыз. Со сяна, Л.Н. Буранова мадиз егитъёс пӧлын йӧскалык кусыпъёсты радъянын ивор вӧлмытон валтосъёслэн интызы сярысь. Т.П. Боталова тодматӥз Калыкъёслэн Эшъяськон юртсылэн ужез сярысь. Татысь ӧнерчиос быгатыса ужало мерлыко огазеяськонъёсын. Арысь аре огазеяськонъёслэн лыдзы будэ.

Озьы ик доклад лыдӟиз Н.А. Уразбахтина, ёрос администрацилэн тӧроезлэн мер юанъёсъя воштӥсез. Ивортонэз сӥземын ёросысь мерлыко огазеяськонъёслэн ужъёссылы но экстремизмлы пумит нюръяськон ужъёслы. Семинарлы йылпумъян лэсьтӥз «Алнаш ёрос» муниципал кылдытэт администрацилэн тӧроез А.В. Семенов. Со пусйиз таӵе семинаръёслэсь кулэлыксэс. Ог-оген пумиськон, вераськон, тодон-валанэн воштӥськон валаны юрттэ, калык лулчеберетэн тодматскон пыр пӧртэм выжысь адямиос ог-огзылы матэгес луо, ог-огзэс валаны но гажаны, ог-огенызы вачеужаны кутско шуыса.

Ужрадъясьёс: Удмурт Элькунысь йӧскалык политикая министерство, «Алнаш ёрос» муниципал кылдытэтлэн Администрациез, Алнаш ёрос Администрацилэн Лулчеберетъя, йӧскалык кусыпъёсъя но туризмъя кивалтонниез.