02-06-тӥ толшор толэзе «Дружба» лагерын удмурт егитъёслэн «Шунды» мерлыко огазеяськонзы Удмурт Элькунысь йӧскалык политикая но Физкультурая, спортъя но егитъёсын ужан политикая министерствоосын, Калыкъёслэн Эшъяськон юртэнызы ӵош егит азьветлӥсьёсты дасянъя «Вамыш» лагерь смена ортчытиз. Ӵектос радъяськиз удмурт егит азьветлӥсьёсты дасян вылысь. Сменае вуизы 40 егит нылъёс но пиос. Вить нунал ӵоже 10-11-тӥ классъёсын дышетскисьёс, студентъёс 4 программая тодон-валан басьтӥзы: «крезьгурен ужасьёс», «нылпиосын ужасьёс», «видеоен ужасьёс», «ужрадэз дасясьёс».

Лариса Ускова но Ирина Трубицына егитъёслы дасязы тренингъёс, ролевой шудонъёс но пӧртэм упражнениос, синмысь-синме вераськонъёс. Шутэтскон программазы но пиналъёслэн туж узыр вал – визь сынан шудонъёс, спорт ӵошатсконъёс, диджейёслэн нюръяськонзы, «Крокодил» шудон. Кемалы сюлэмазы кылёз удмурт йӧскалык театрысь актёръёсын пумиськон но В.Шукшинлэн веросъёсызъя гожтэм спектакль. Нылъёс понна нимысьтыз мастер-класс радъяз косметолог, дышетӥз асьсэлэсь тусбуйзэс лэсьтыны но асьсэды утялтыны.

«Ӝыт Вамыш» («Вечерний Ургант» передачая) тужгес но яркытэз ужрад луиз. Татын егитъёс возьматӥзы малы соос дышизы та нуналъёс куспын – «нылпиосын ужасьёс» возьматӥзы идеальной вожатоез, «видеоен ужасьёс» «Шундылэн» ӵектосъёсызъя ролик дасязы, «крезьгурен ужасьёс» ужрадэз крезьгурен тырмытӥзы. Йылпумъян ужрадэз малпазы но ортчытӥзы «ужрадэз дасясьёс».

Вань юанъёсъя вазиськоно таӵе телефонъя: 8 904 837 14 33, (3412) 63-10-44, (Тронина Ольга Алексеевна – «Шунды» мерлыко огазеяськонлэн кивалтӥсез