Калыкъёслэн Эшъяськон юртазы Вань удмуртъёслэн «Удмурт Кенеш» огазеяськонзылэн Пичи Кенешазы йылпумъянъёс лэсьтэмын вал.

Йӧскалык политикая министр Эдуард Петров ӧнерчиос азьын доклад лыдӟиз, отын со 2024-тӥ аре удмурт кылэз утён но азинтон удысын лэсьтэм ужъемышъёс сярысь ивортӥз:

— Кун кылъя политикая концепциез юнматон, этноязыковой политикая координационной кенеш кылдытон. «Сохранение, изучение и развитие государственных языков УР и иных языков народов УР» кун программаез улонэ вӧлмытон улсын, пусйиз Эдуард Степанович, таӵе ӵектосъёс азьланьтӥсько:

— Бадӟым этнографической диктант;

— Билингва;

— «Ӝу» комиксъёсын лаборатория;

— Удмурт кылын визькылъёсын но лэчыткылъёсын плакатъёс карлэн трамвайёсаз поттэмын.

Озьы ик верамын вал 10Д номеро троллейбусын кык кун кылъёсын дугдылонниосты чузъяськытон пумысен но Удмурт кыллэн нуналаз Сберен ӵош ужанъя тупанкыл гожтон сярысь, талы луыса Гигачат удмурт кыллы дышетскоз.

Озьы ик ужрадын вал:

РФ-ысь Кун Думалэн депутатэз Олег Гарин ужрадэ люкаськемъёсты ӟечкылаз.

Людмила Кириллова карлэн вылтусаз удмурт-ӟуч гожтэмъёсты уже кутон сярысь вераз.

Вань удмуртъёслэн «Удмурт Кенеш» огазеяськонлэн ёрос ёзэтъёсыз озьы ик йылпумъянъёс лэсьтӥзы.

Та ужрадлэн кыкетӥ люкетэз сӥё-дано данъетанлы сӥземын вал. Трокай Борисов нимо премилэн лауреатэз – Надежда Константиновна Золотарева – пусъемын но «Удмурт Кенеш» огазеяськонлэн Данъян Книгаяз вить выль нимъёс пыртэмын. Со сыӵе адямиос, кудъёсыз пайдалыко, мыло-кыдо тыршо удмурт калыклэсь кылзэ, сям-йылолъёссэ, лулчеберетсэ, устолыксэ, дышетонзэ утьыны но вӧлмытыны.

Ӟечкыласькомы сӥё-дано данъетъёсын! Котькуддылы тау кариськомы удмурт кылэз но лулчеберетэз утён но азинтон удысын бадӟым уж нуэмды понна! Азьланяз эшшо но трос вормонъёс сӥзиськом!