11-12-тӥ тулыспалэ Ижкарын Вань удмуртъёслэн XIII ӧтчамзы радъяськоз.

Ужрадэ пыриськозы «Удмурт кенеш» ассоциацилэн котькуд ёзэтэзлэн делегатъёсыз. Удмуртиысь сяна, делегатъёс вуозы Татарстан, Башкортостан, Марий Эл элькунъёсысь, Пермь, Свердловск, Киров улосъёсысь, Мускоысь, Санкт-Петербургысь но Нижневартовскысь. Огъя, 380 адями люкаськыны кулэ.

Съезд ужалоз куать ӧръя: дышетон удыс но кылэз азинтон, этнополитика но эрикрад, егитъёсын ужан, лулчеберет, ивор вӧлмытон сӧзнэтъёс но выль технологиос, семья но тазалык.

Нырысьсэ ӧтчам ужалоз кык нунал. 11-тӥ тулыспалэ ужрад ортчоз Удмурт йӧскалык театрын, 12-тӥ тулыспалэ – Чайковский нимо операя но балетъя театрын.

Ужрадэз ортчыто: Вань удмуртъёслэн «Удмурт кенеш» ассоциацизы, Удмурт Элькунысь йӧскалык политикая министерство, Калыкъёслэн Эшъяськон юртсы.