2016-тӥ арын удмуртъёс понна валтӥсь ужрад Вань удмуртъёслэн XIII ӧтчамзы луоз. Семёнов И.Н., «Удмурт кенеш» ассоциацилэн кивалтӥсез, вуоно ужрадлы дасяськон сярысь вераз, ӧтчамлэсь удмуртъёслы кулэлыксэ пусйиз. Ужрадэ дасяськонъя оргкомитетэн кивалтэ Удмурт Элькунлэн Тӧроез А.В. Соловьёв. Та вера ӧтчамлэн политика кужымез сярысь.

2016-тӥ арын 11-12-тӥ тулыспалэ Ижкаре люкаськозы «Удмурт кенеш» ассоциацилэн котькуд ёзэтэзлэн делегатъёсыз. Удмуртиысь сяна, делегатъёс вуозы Татарстан, Башкортостан, Марий Эл элькунъёсысь, Пермь, Свердловск, Киров улосъёсысь но Мускоысь. Огъя, 450-лэсь ятыр адями люкаськыны кулэ.

Съезд ужалоз куать ӧръя: дышетон удыс но кылэз азинтон, этнополитика но эрикрад, егитъёсын ужан, лулчеберет, ивор вӧлмытон сӧзнэтъёс но выль технологиос, семья но тазалык.

Öтчаме дасяськон сяна, Пичи кенешын мукет юанъёсты но эскеризы. Ижкарысь Первомай ёросысь ёзэтлэн кивалтӥсез Ольга Шилова удмурт кылъя но литературая дышетӥсьёслэн нимынызы вазиськиз дышетон программаосты ӟуч кылэ берыктонэн герӟаськем югдурез сэрттыны-пертчыны юрттэт курыса.

Удмурт егитъёслэн «Удмурт-а мон?» форумзы сярысь вераз Т.В. Ишматова, «Удмурт кенеш» ассоциацилэн вице-президентэз. Ужрад ортчоз толсуре. Валтӥсь ужпумез – удмурт кылэз но лулчеберетэз утён уже егитъёсы кыскон. Форумез радъясьёс туризмъя, информационной технологиосъя, политикая, брендингъя но мукет ӧръёсъя тунсыко семинаръёс дасяло.

Удмурт Элькунлэн Тӧроез вордӥськем нуналэныз ӟечкылаз Валентин Кузьмич Тубыловез, «Удмурт кенеш» ассоциацилэсь Дано Президентсэ, Удмуртилэсь Дано улосчизэ. Пусйиз солэсь 90-тӥ аръёсы элькунэнымы быгатыса кивалтэмзэ.

Удмурт калыклэсь лулчеберетсэ, кылзэ, сям-йылолъёссэ улӟытонын но азинтонын бадӟым уж лэсьтэмзы понна «Удмурт кенеш» ассоциацилэн Данъян книгаяз пыртӥзы таӵе адямиосты: Ангелина Серапионовна Дерендяева, Валерий Яковлевич Митрофанов, Виталий Вилорьевич Окулов,Ирина Михайловна Шеда-Зорина, удмурт ветеранъёслэн «Мӧзмон» клубзы (кивалтисез – Моторина Раиса Константиновна).

Ужрадэз йылпумъяса Андрей Корнилов но Иван Котельников «Элькуновидение-2015» вожвылъяськонын вормем кырӟанзэс быдэстӥзы. Кырӟанэз быдэстӥсьёслы но кылъёсызлэн авторезлы кузьым сётизы – 40 000 манет.