12-тӥ тулыспалэ Вань удмуртъёслэн XIII ӧтчамзылэн йылпумъян нуналэз ортчиз. Калык Президентэ Татьяна Витальевна Ишматоваез бырйиз. 330 делегат пӧлысь 317-ез дур басьтӥз выль кивалтӥсьлы.

Ужрадэ пыриськизы: Удмурт Элькунлэн Тӧроез А.В. Соловьев, Удмурт Элькунысь Кун Кенешлэн Тӧроез В.П. Невоструев, Совет Федерациысь тодосъя, дышетонъя но лулчеберетъя комитетлэн кивалтӥсезлэн воштӥсез А.А. Волков, Финн-угор калыкъёслэн консультативной комитетсылэн кивалтӥсез Валерий Марков, Удмурт Элькунысь йӧскалык политикая министр Л.Н. Буранова.

Съездлэн делегатъёсызлы ӟечкылан келяз Федерацилэн Советэзлэн Тӧроез Валентина Матвиенко.

Татьяна Витальевнаез ӟечкылаз Удмурт Элькунлэн Тӧроез -А.В. Соловьев: «Татьяна Витальевна мерлыко огазеяськонъёсын трос ужам адями. Ми соин ӵош Кун Кенешын ужамы. Депутат луыса кема ке но оз ужа, со дыр куспын ассэ возьматӥз быгатӥсь, оскымон адямиен. 7 ар ӵоже «Удмурт Кенеш» огазеяськонлэн вице-президентэз вал. Соин ик вань ужпумъёсты тодэ. Тода мар кароно соосты быдэстон понна. Оскисько, Татьяна Витальевна калыклэсь осконзэ быдэстоз шуыса».

Т.В. Ишматовалэн кылъёсызъя, туннэ нуналлы «Удмурт Кенешлы» пӧртэм улосъёсын улӥсь удмуртъёсты огазеяны кулэ. Малы ке шуоно, соос одӥг ужез быдэсто.

Öтчамын финн-угор конгрессэ мыныны делегатъёс быръемын. Ужрад ортчоз Финляндиын инвожо толэзе. Отчы мынозы Игорь Семенов, Николай Мусалимов, Марина Ягудкина, Сергей Касаткин и Наталья Кондратьева.