Вань удмуртъёслэн XIII Öтчамзы ужзэ кутскиз

11-тӥ тулыспалэ Вань удмуртъёслэн XIII отчамзы ужзэ мытӥз. Ужрадэ Удмуртиысь сяна Татарстанысь, Башкириысь, Марий Элысь, Пермь, Киров, Свердловск, Томск улосъёсысь, Мускоысь но Санкт-Петербургысь 375 делегатъёс вуизы.

Люкаськем калыклы ӟечкылан но пумитан кылъёсын вазиськизы Удмурт Элькунлэн Тӧроез А.В. Соловьев, Удмурт Элькунысь Кун Кенешлэн Тӧроез В.П. Невоструев, Совет Федерациысь тодосъя, дышетонъя но лулчеберетъя комитетлэн кивалтӥсезлэн воштӥсез А.А. Волков, Финн-угор калыкъёслэн консультативной комитетсылэн кивалтӥсез Валерий Марков, Удмурт Элькунысь йӧскалык политикая министр Л.Н. Буранова.

Аслаз вазиськоназ А.В Соловьёв пусйиз: «Трос аръёс ӵоже асьмелэн элькунамы тупаса уло пӧртэм выжжысь но пӧртэм инмаръёслы оскись адямиос. Та ужын бадӟым инты басьто мерлыко огазеяськонъёс. «Удмурт Кенеш» – элькунысьтымы тужгес даноез но бадӟымез огазеяськон. Тӥ бадӟым уж лэсьтӥськоды удмурт калыклэсь кылзэ но сям-йылолъёссэ утён, лулчеберетсэ азинтон, егит азьветлӥсьёсты будэтон понна. Туннэ бадӟым тау шуэме потэбадӟым уж нуэмдылы!» Александр Васильевич оскытӥз, элькунлэн кивалтэтэз азьланяз но юрттоз удмурт лулчеберетэз, искусствоез азинтыны. Озьы ик йылпумъянъёс лэсьтӥз удмурт кылын книга поттонлы. 2015-тӥ арны «Удмуртия» книгапоттонни удмурт кылын 37 книга поттӥз. Со тросгес луэ 2014-тӥ арын поттэм книгаослэн лыдэнызы (21 книга) ӵошатыса.

Удмурт Элькунысь йӧскалык лулчеберетъя мерлыко огазеяськонъёслэн нимынызы вазиськиз С.С. Фефилов, Удмурт Элькунысь Кивалтэтлэн Тӧроезлэн ваоштӥсез, ӟуч лулчеберетъя Удмурт Элькунысь огазеяськонлэн кивалтӥсез.

Нуназе бере ӧтчам ужзэ азинтӥз «Берёзка» лагерын. Татын ужазы 6 секциос: «Этнополитика но эрикрад», «Кыл но дышетон», «Лулчеберет», «Удмурт егитъёс», «СМИ но ивортодэто технологиос».

Кыкетӥ нуалаз ӧтчам ужалоз Удмурт Элькунысь операя но балетъя кун театрын. Пленарной заседаниын секциослэн ужъёссылы йылпумъянъёс лэсьтозы, «Удмурт Кенеш» огазеяськонлы кивалтӥсь быръен радъяськоз. Йылпумъяськоз ужрад Удмурт Элькунысь Тӧроен пумиськонэн.