2-тӥ тулыспалэ Калыкъёслэн Эшъяськон юртазы вань удмуртъёслэн «Удмурт кенеш» огазеяськонзылэн Пичи кенешез ортчиз. Валтӥсь юан – Вань удмуртъёслэсь XIII ӧтчамзэс ортчытон.

Пичи кенешлэн ужаз пыриськизы элькунмылэн ёросъёсысьтыз но каръёсысьтыз, Татарстан, Башкортостан, Пермь улосъёсысь азьветлӥсьёс, Удмурт Элькунысь йоскалык политикая министр Л.Н. Буранова, ивор вӧлмытон валтосъёс, мукет удмурт огазеяськонъёслэн ёзчиоссы.

«Удмурт Кенеш» огазеяськонлэн кивалтӥсез И.Н. Семенов люкаськемъёсты ӧтчамын эскероно юанъёсын но ужрадъёсын, огазеяськонлэн 3 ар ӵоже лэсьтэм ужъёсыз сярысь ӧтчаме дасям докладэн тодматӥз. Докладын, кылсярысь, пусъемын огазеяськонлэн удмурт кыллы, сое волмытонлы, дышетскон ужъюртъёсын дышетонлы нимысьтыз саклык висъямез. Удмурт кыллэсь кутӥськемзэ паськытатон вылысь огазеяськон Удмурт Элькунысь Кун Кенеше «Удмурт Элькунлэн «Удумрт Элькунысь кун кылъёс но Удмурт Элькунысь мукет калыкъёслэн кылъёссы сярысь» катаз воштонъёс пыртон сярысь» катлэсь ӵектоссэ сётӥз.

Бӧрысь люкаськемъёс ӧтчамлэн Резолюциеныз но Регламентэныз тодматскизы.

11-тӥ тулыспалэ 10.00 часэ Удмурт йӧскалык театрын Вань удмуртъёслэн XIII ӧтчамазылэн сӥё-дано усьтонэз луоз. Пленарной заседаниын 3 ар куспын лэсьтэм ужъёс сярысь вералозы «Удмурт кенеш» огазеяськонлэн кивалтӥсез И.Н. Семенов но ёросъёсысь ёзэтъёслэн кивалтӥсьёссы. Бӧрысь ужез азинтозы секциослэн ужзы. Нош ӝыт К. Герд нимо йӧскалык премилэсь лауреатъёссэ данъялозы, Калыклы шулдыр мылкыд кузьмалозы элькунысьтымы тужгес но устоосыз коллективъёс.

12-тӥ тулыспалэ ужрад отрчоз Удмурт Элькунысь П.И. Чайковский нимо операя но балетъя театрын. Пленарной заседаниын йылпумъянъёс лэсьтозы секциослэн ужъёссылы. «Удмурт Кенеш» мерлыко огазеяськонлы кивалтӥсь быръён ортчоз. Йылпумъяськоз ужрад Удмурт Элькунысь Тӧроен пумиськонэн.