«Урарту» армян мерлыко огазеяськон Вардавар йӧскалык шулдыръяськон ортчытӥз.

Ужрадэ лыктӥзы Урарту огазеяськонлэн 11 ёзэтъёсызлэн азьветлӥсьёссы, озьы ик Татарстанысь, Башкоростанысь, Пермысь куноос, Россиысь калыкъёслэн ассамблеязылэн тӧроез Светлана Смирнова, Удмурт Элькунысь йӧскалык политикая министрлэсь ужзэ быдэсъясь Лариса Буранова, «Воткакар» муниципал кылдытэт администрациысь ӧнерчиос.

Куноослэн луонлыксы вал армян кырӟанъёсты но кылбуръёсты кылзыны, армян эктонъёсты учкыны но экыны. Праздник радын ик армрестлингъя, мини футболъя, волейболъя, гир ӝутканъя ӵошатсконъёс ортчизы.

Удмурт Элькунысь йӧскалык политикая министрлэсь ужзэ быдэсъясь Лариса Николаевна Буранова тодмостӥз: «Туэ куазь ӧз ке но лэзьы вуэн пыласькон йылолэз ортчытыны, праздник шулдыр вал. Куноослэн Вардавар сярысь тодэ ваёнъёссы кемалы кылёзы».