УЭ-ысь йӧскалык политикая министерство ёросъёсы ветлонзэ азинтӥз – туннэ министерствоысь ужасьёс Эдуард Петров министрен ӵош Вавож ёросэ вуылӥзы.

Ужрад ортчон дыръя калыкен пумиськон ортчытэмын вал, Кун йӧскалык политикалэн Стратегиезлэн ужпумъёсыныз тодматӥзы. Дышетон семинаръёс, тематической но проектной секциос ортчытӥзы.

Кенешонын дышетӥсьёслы, завучъёслы, анай-атайёслы терроризмен но экстремизмен нюръяськонъя ивортодэтэн вераськонъёс дасямын вал.

Валтӥсь пленарной люкаськем бере дышетон ужъюртъёсысь ӧнерчиослы лекция лыдӟизы УЭ-ысь Тӧролэн но Кивалтэтлэн Администрациезлэн терроризмлы пумит ужез радъянъя ёзэтлэн кивалтӥсез Олег Кузнецов но солэн воштӥсез Ольга Меркушева.

Коммерциен герӟаськымтэ Вавож ёрослэн огазеяськонъёсысь огмуртъёслы, грант вожвылъяськонъёслэсь пӧртэм куронъёссэс лыдэ басьтыса, озьы ик Президентлэн фондысьтыз грант вожвылъяськонъёсъя, проектной заявкаосты эскеронъя семинар ортчытэмын вал. Секциез нуиз Лариса Князева, Калыкъёслэн эшъяськон юртысьтызы ӧнерлыко ужась но тренер.

Удмурт Элькунъя коммерциен герӟаськымтэ огазеськонъёслэн Минюстысьтыз кивалтэтлэн тӧроез Анна Сунцова «ликбез» ортчытӥз но коммерциен герӟаськымтэ огазеськонъёслэн эрикрадъя ужамзы сярысь юанъёсты сэрттӥз-пертчиз.

Министр калыкен нимысьтыз пумиськон радъяз. Вань мылкыд карисьёс Эдуард Петровлы, Удмурт Элькунысь йӧскалык политикая министрлы, сюлмаськытӥсь юанъёссэс сётыны быгатӥзы.

Нунал лулчеберет программаен йылпумъяськиз – шаертодонъя ёрос музейын экскурсия ортчытэмын вал, отын Вавож ёрослэн историеныз но лулчеберетэныз тодматскизы. Озьы ик Ӧнеръёсъя юртэ ветлӥзы но декоративно-прикладной устолыкъёсъя ӧнерчиосын кенешизы.

Вавож ёросын пумиськон пайдаё ортчиз. Муниципалитетъёсы вуылон котьма ласянь туж пайдаё луэ. Тау кылъёс вераськомы та ужрадэз дасясьёслы но отчы пыриськисьёслы.