26-тӥ оштолэзе удмурт егитъёслэн “Шунды” мерлыко огазеяськонзы волейболъя куинетӥ чемпионат радъя. Ужрадлэн валтӥсь ужпумъёсыз: егитъёсты спортэ кыскон, вылӥ но шоръёзо дышетон ужъюртъёсысь студентъёсын ужанэ выль амалъёс кутон, эшлыко кусыпъёсты юнматон.

Ижкарысь сиён-юон индустрия техникумлэн спортзалаз люкаськозы удмурт кылэз тодӥсь егитъёс. Кылем арын чемпионатэ пыриськиз 7 команда. Туэ ӵошатсконэз радъясьёслэн малпамзыя, командаослэн лыдзы тросгес луоз. Вормисе потэмъёс утозы портэм призъёс но кубок. Чемпионатэ пыриськон понна заявка келяно 24-тӥ оштолэзезь таӵе адресъя: Ижкар, Орджоникидзе урам, 33а, Калыкъёслэн эшъяськон юртсы, Тронина Ольга Алексеевналы. Яке электрон почтая: troninaolga@yandex.ru.

Чемпионат ортче Удмурт Элькунысь физкультурая, спортъя но туризмъя министерстволэн, Удмурт Элькунысь йӧскалык политикая министерстволэн, Ижкарысь сиён-юонъя индустрия техникумлэн но Калыкъёслэн эшъяськон юртсылэн юрттэменызы сэрен. Ватсаса тодэт басьтыны луоз таӵе телефонъя: 8 904 837 14 33 – Тронина Ольга Алексеевна.