Удмурт егитъёслэн «Луонлыкъёс сётонъя «Куара» огин» улосвыл мер огазеяськон «Вотэс» удмурт IT-класс» (12+) ӵектосэз Азьмуртлэн грантъёсызъя фондлэн юрттэменыз йылпумъяз. Уже пыриськизы 7-11-тӥ классъёсысь нылпиос, кудъёсыз удмурт кылэз тодо. Соос удмурт кылын дунтэк куинь мобильной шудонъёс кылдытӥзы. Соосты RuStore*ватсэтысь шедьтыны луэ ини.

Ӵектослэн азьмугез – возьматыны удмурт кыллэсь кулэлыксэ лулчеберет но технология удысын. Та ужрад лулчеберет узырлыкез утёнлы но азинтонлы юрттэ, со «Семья» йӧскалык ӵектослэн азьмугъёсызлы тупа.

Дышетон кык люкетлэсь кылдӥз. Нырысетӥяз пиналъёс ӧнерчиосын валче лекциосы но дышетон ужъёсы пыриськизы. Кыкетӥяз ватсэтъёс ини лэсьтӥськизы. Командаосы люкиськыса ӧнерчиосын пинал программистъёс пӧртэм арлыдъем нылпиослы ватсэтъёс кылдытӥзы.

Та тунсыко ужрадлэн ужъемышъёсыз – удмурт кылын куинь мобильной шудонъёс:

«Ондӥ и Палэсмурт» (6+) пиксель-арт амалэн 2D-платформер;

«Перепеч Кафе» (6+) удмурт сиён пӧранъя симулятор;

«Кыйлуд нюлэс» (6+) мифъёсы но веранъёсы мыромытӥсь шудон-квест.

*РуСтор