Центр интыяськемын Воткакарысь 5-тӥ номеро лыдӟетъюртын. Та ужъюрт трос аръёс ӵоже вачекусып возе карысь мерлыко огазеяськонъёсын.

Арлы быдэ лыдӟетъюртын радъяське «Берыктӥськом анай кылэ» вожвылъяськон, быдэстӥське «Мынам вордӥськем шаере» ӵектос. Лыдӟетъюртлэн фондаз удмурт, бигер, чуваш, украин, белорус, казах но мукет кылъёсын книгаос вань. Туннэ нунал понна Воткакарын 15 мерлыко огазеяськонъёслэн ёзэтъёссы ужало. Соослэн ёзчиоссы шаертодонъя уж нуо, пырисько Удмуртиын улӥсь калыкъёслэсь кылзэс но сям-йылолъёссэс утёнлы но азинтонлы сӥзем конференциосы, адӟытонъёсы, ӵектосъёсы.

Вачеужанэз пайдалыкогес карон вылысь Центрын йӧскалык лулчеберетъёсъя нимысьтыз бӧлетъёс кылдытэмын: «Славян лулчеберет» «Финн-угор лулчеберет», «Тюрк калыкъёс». Озьы вань на «Эшъяськон бӧлет» но «Калыклэн тусъёсыз» нимо шаертодонъя но йӧскалык литерая абонемент. Азьпалан малпамын на шаертодонъя факультатив радъяны, конференциос но семинаръёс ортчытыны.

Центрлэн усьтӥськеменыз ӟечкылазы Удмурт Элькунысь йӧскалык политикая министр Л.Н. Буранова, Калыкъёслэн Эшъяськон юртсылэн кивалтӥсез Т. Боталова, «Удмурт Кенеш” ассоциацилэн кивалтӥсез И.Н. Семенов, Ӟуч лулчеберетъя огазеяськонлэн кивалтӥсезлэн воштӥсез С.В. Щапова.

Азьланяз Центр мукет ужъюртэ выжоз. Тодады вайытӥськом, элькунамы Йӧскалык политикая министерстволэн кичӧлтэмезъя мерлыко огазеяськонъёслы юрттэт сётон вылысь Калыкъёслэн Эшъяськон юртсылэн сӧзнэтэз кылдытэмын луоз.