7-тӥ оштолэзе Воткакарын «Удмуртия – вместе!» интывыл огинъёслэн форумзы (0+) радъямын вал. Соос оштолэзь куспын элькунлэн 4 каръёсаз, кудъёсаз Калыкъёслэн Эшъяськон юртсылэн луонлыкъёсъя центръёсыз усьтэмын, ортчозы.

Форуме пыриськизы муниципал кылдытэтъёслэн тӧрооссы, кар, ёрос но гурт администрациосысь ужасьёс, мерлык кенешъёсысь ёзчиос, муниципал кичӧлтонъёслэн но этнокультурной ӵектосъёслэн кылдытӥсьёссы, мерлык но йӧскалык-лулчеберетъя огазеяськонъёслэн кивалтӥсьёссы но азьмынӥсьёссы, коньдэтэн возиськись дышетонъя, лулчеберетъя, егитъёсын ужан политикая ужъюртъёсысь ужасьёс, озьы ик ужбергатӥсьёс.

Форум «Чайковскиен тулыс» («Весна с Чайковским») лулчеберетъя марафонэн но Благовещенской соборын экскурсиен усьтӥськиз. Люкаськемъёсты ӟечкылаз УЭ-ысь Кивалтэтлэн Председателезлэн воштӥсез Наталья Тойкина:

«Лулчеберет  сыӵе герӟет луэ, кудӥз милемлы юрттэ ог-огдэ гажан но валан вылын ӟеч улон кылдытыны. Таиз ар асьме понна туж тунсыко – Быдӟым Вормонлы 80 ар, Удмуртилэн кунлык басьтэмезлы 105 ар но Пётр Ильич Чайковскийлы 185 ар. Пусйымон, нырысетӥ форум Воткакарын ортче шуыса – крезьгур таланто адямилэн вордскем шаераз. Чайковский аслаз устолыкеныз, тыршеменыз быдэс Россиез тодмо кариз. Туннэ «Чайковскиен тулыс» («Весна с Чайковским») лулчеберетъя марафон ужзэ кутскиз, толэзь куспын, 7-тӥ куавртолэзёзь Воткакар трос ужрадъёсын тырмытэмын луоз – фестивальёсын, вожвылъяськонъёсын, адӟытонъёсын. Ваньдэсты ӧтисько пыриськыны».

Ужрад улсын пленарной кенешон ортчиз, кытын «Духовно-нравственные ценности как основа гармонизации межнациональных и межконфессиональных отношений в Удмуртской Республике» нимо докладэн йӧскалык политикая министр Эдуард Петров вераськиз.

Со тау кариз йӧскалыккуспо удысын тыршыса ужасьёслы. Озьы ик пусйиз, Воткакарын мыло-кыдо ӵектосъёс улонэ вӧлмо шуыса. Со ӵектосъёс тупаса улонлы, историез утёнлы, лулпуш-сӥбур дунлыкъёсты юнматонлы сӥземын.

Ужрадын вераськизы на УЭ-ысь Мерлыко палаталэн ёзчиосыз Юлия Шахтина, Ирина Шихарева, Дмитрий Выдрин, Мария Созыкина, Раиль Галиахметов. Нош карлэн Администрациезлэн тӧроезлэн воштӥсез мер юанъёсъя Жанна Александрова мадиз, кызьы лулпуш дунлыкъёсты юнматыны Воткакар вылын.

«Удмуртия – вместе!» интывыл огинъёслэн форумъёссэс радъяло Калыкъёслэн Эшъяськон юртлэн луонлыкъёсъя центръёсыз но Удмуртилэн Мерлык палатаез УЭ-ысь йӧскалык политика министерстволэн но Йӧскалык ужъёсъя федерал агентстволэн юрттэменызы.

Вуоно пумиськонъёс ортчозы:

15-тӥ оштолэзе – Можгакарын,

18-тӥ оштолэзе – Глазкарын,

23-тӥ оштолэзе – Сарапулын.