25-тӥ инвожое святыняез Ижкарысь Архангел Михаиллэн собораз интыязы. Сое пумитазы черкысь духовенствоен ӵош Ижкарысь но Удмуртиысь митрополит Викторин, Удмурт Элькунысь Тӧро но Кивалтэт Администраци кивалтӥсьлэсь ужзэ быдэсъясь Александр Журавлёв, йӧскалык политикая министр Эдуард Петров, лулчеберетъя министр Владимир Соловьёв, УЭ-ысь Кун Кенешлэн депутатэз Татьяна Ишматова, Ижкар Администрациысь мерлык политикая Тӧролэн воштӥсез Дмитрий Чистяков. Озьы ик карысь кадет дышетскисьёс нимысьтыз караул радъязы.

Черк ужасьёс ковчегез соборе пыртӥзы но, Вознесения Господня праздникез пусйыса, Инмар литургия ортчытӥзы. Собере Георгий Победоносец великомучениклы сӥзьыса вӧсяськон радъямын вал. Лыктэмъёс сяна, «Удмуртиысь атайёслэн Кенешсы» мерлык огазеяськонысь ёзчиос но вӧсяськизы.

Лысьӧмъёсыныз ковчег соборын луоз. Сое чупаны вань мылкыд карисьёс нунал ӵоже быгатозы, нош 26-тӥ куартолэзе – 10:00 часозь гинэ. Собере святыняез Воткакарысь Благовещенской черке нуозы. Улосичос Георгий великомучениклы йыбыртыны быгатозы 14:00 часысен 16:00 часозь.

Московской но быдэс Русьысь Святой Патриарх Кириллэн бакель (благословить) каремезъя 6-тӥ куартолэзьысен «Всероссийский молебен о Победе» ортче. Со герӟаськемын Георгий Победоносецлэн лысьӧмъёсыныз ковчегез, Троицкой-Сергиев лавраысь поттыса, Ӟуч Православной Черке ваёнэн. Оглом святыня Россиысь ог 100 каръёсы вуылоз.