23-тӥ тулыспалэ Удмуртиысь делегаци вуылӥз Киров улосэ Вятские Поляны каре.Угось татын удмурт лулчеберетлы сӥзем нуналъёслы йылпумъянъёс лэсьтӥзы. Бускель улосын удмуртъёс уло Уинск, Кильмезь, Слобода, Малмыж ёросъёсын. Ӵапак та ёросъёсысь удмуртъёс люкаськизы Вяткие Поляны карысь Лулчеберетъя «ЭтноМир» центре. Татын удмурт лулчеберетэз утён но азинтон сярысь вераськонъёс мынӥзы, лэсьтэм ужъёслы дунъет сётъязы. Ужрадэ пыриськизы Удмурт Элькунысь йӧскалык политикая министрлэсь ужзэ быдэсъясь Л.Н. Буранова, Вань удмуртъёслэн «Удмурт кенеш» ассоциацизылэн Президентэз И.Н. Семенов, Камсьӧр удмуртъёслэн центрзылэн кивалтӥсез Ф.А. Чибышева, Калыкъёслэн Эшъяськон юртсылэн директорезлэн воштӥсез Т.П. Федорова, «Мынам Удмуртие» телеканалысь журналист Е.В. Слесарева, «Шулдыр ӝыт» ансамбль.

Со сяна Кизнер ёросысь кибашлыос киужъёсынызы возьматон радъязы. «Удмуртия» книгапоттонни бускель удмуртъёслы вайиз пӧртэм пумо удмурт книгаос, кыллюкамъёс, календарьёс, бичетъёс. Лыктэм куноослэн синъёссы ик ӝуатскизы удмурт кылын тамында книгаосты адӟыса. Вожмаськыса басьязы соосыз. Одӥгез бускель удмурт кышно шумпотонэныз люкиськиз: «Табере удмурт кырӟанъёсты кырӟаса ческыт удмурт сиёнъёсты пӧраны луэ! Кӧня мында удмурт книгаос поттӥськоды вылэм! Та книгаосты басьтӥ но, сюлмы ик капчияк луиз, кема утчам арбериме шедьтӥ кадь!»

Л.Н. Буранова тодмостӥз: «Удмурт Элькунысь йӧскалык политикая министерство мылысь-кыдысь ужа палэнын улӥсь удмуртъёсын. Туж шумпотӥськомы выль огазеяськонлэн кылдэмезлы. Табере Вятские Поляныысь удмуртъёслэн огазеяськонзы Вань удмуртъёслэн «Удмурт кенеш» ассоциацизылэн ёзэз луоз. Карлэн Администрациез но соослы бадӟым юрттэт сётэ. Оскиськомы, таӵе ужрад бере Министерстволэн Вятские Поляны карысь удмуртъёссын кусыпъёсыз эшшо но юнгес но пайдалыкогес луозы».

Та ужрадэз дасяны юрттэмзы, удмурт кылзэ но лулчеберетэз утён но азинтон удысын бадӟым уж нуэмзы понна Лариса Николаевна Удмурт Элькунысь йӧскалык политикая министерстволэн таукаронэныз пусйиз Вятские Поляны карлэсь Тӧрозэ Кисляков Сергей Евгеньевичез, Лулчеберетъя «ЭтноМир» центрлэсь кивалтӥсьсэ Собакинских Наталья Владимировнаез, Калык творчествоя Киров карысь юртлэсь кивалтӥсьсэ Соболев Владимир Геннадьевичез.

Оскиськомы, таӵе шуныт но пайдаё пумиськонъёс арысь аре радъяськозы шуыса!