9-тӥ гудырикошконэ Киров улосысь Слободской ёросысь Светозарево гуртын «Выль ӝук» калык шулдыръяькон ортчиз.

Та празднике бускель удмурт гуртъёсысь удмуртъёс сяна, мукет йӧслыко адямиос но шумпотыса пырисько. Озьы ик арлы быдэ татчы Удмурт Элькунысь йӧскалык политикая министерствоысь ӧнерчиос вуо. Туэ министерствоысь этнокультураез азинтонъя ёзэтлэн кивалтӥсез А.В. Габдуллина, Калыкъёслэн эшъяськон юртсылэн калыккуспо но финн-угор кусыпъёсъя ёзэтлэн кивалтӥсез А.Н. Прокопъев вуизы калыкез ӟечкыланы. Кузьымъёс но ваизы – удмурт кылын книгаос но шудонъёс. Нош калыклэсь мылкыдзэ ӝутыны лыктӥз «Шулдыр ӝыт» ансамбль но Балезино ёросысь коллектив.

Люкаськем калыклэн мӧзмыны дырыз ӧй вал. Радъямын вал кибашлыослэн киужъёсынызы вузкарон-возьматон, Киров улосысь но Удмурт Элькунысь коллективъёс бадӟым концерт дасязы, егитъёслы «Батыр-шоу» и «Выль кен» вожвылъяськонъёс радъямын вал, пиналъёслы нимысьтыз площадка ужаз.

«Та праздниклэн тодметпусэз ӝук луэ. ӝук, зэм но, эшъяськонлэн, тупаса улонлэн тодметпусэз, угось ӝукез пӧзьто пӧртэм кеньыръёслэсь. Котькуд лыктэм адями сое веръяны быгатэ. Киров улосысь удмуртъёслэн та ӟеч йылолзэс туала улонын утьыны быгатэмзы шумпоттэ», – пусйиз Удмурт Элькунысь йӧскалык политикая министрлэсь ужзэ быдэсъясь Л.Н. Буранова.

Шулдыръяськонын лэсьтэм туспуктэмъёсты учкыны луэ татысь: https://vk.com/vj_svetozarevo