27-тӥ толшоре 16.00 часэ Калыкъёслэн Эшъяськон юртазы кык томъем выль ӟуч-удмурт кыллюкамен тодматсконлы сӥзем ужрад ортчоз.

Словарь бордын ужазы Россиысь тодосъя академилэн Урал ёзэтысьтыз Эскеронъёсъя удмурт федерал центрлэн Историяя, кылъя но литературая удмурт институтысьтыз тодосчиос. Поттэмын Удмурт Элькун Кивалтэт юрттэмен Удмуртилэн кунлык басьтэмезлы 100 ар тырмон улсын.

Выль «Ӟуч-удмурт кыллюкам» 1952 бам вылын кык томен пӧрмемын, 55 000-лэсь ятыр кыл пыртэмын (1956-тӥ арын кыллюкаме пыртэмын вал 40 000 кыл). Словарь паськытамын экономика, политика, вузкарон, тодсос, коньдэт но мукет удысъёсысь выль кылъёсты, терминъёсты, озьы ик туннэ нуналэ нош ик кутӥськыны кутскем вуж архаичной кылъёсты пыртэмен сэрен. Кыллюкамысь тросэз кылъёслэн выль значениоссы пусъемын, ӵапак соос возьмато кылын ортчись туала процессъёсты.