1-тӥ гудырикошконэ Можга кар паркын удмурт «Выль» (0+) нимо выль емышъёслэн улоскуспо праздниксы ортчоз. Праздник луоз 2026-тӥ арлэн одӥгез яркыт ужрадэз, кудзэ кунлэн Азьмуртэз Владимир Путин ялӥз Россиысь калыкъёслэн огъя луэмзылэн аренызы.

Та ужрадэ элькунысь пӧртэм каръёсысь но ёросъёсысь делегациос, йӧскалык-лулчеберетъя огазеяськонъёслэн, фермер возёсъёслэн но творчествоя коллективъёслэн ыстэм муртъёссы вуозы. Сӥё-дано усьтон 12 часлы чакламын.

Та нуналэ паркын кӧня ке площадкаос ужалозы. «Ужам ужлэн емышез» нимо валтӥсь ярмарка Удмуртиысь, Татарстанысь но Башкортостанысь крестьян-фермер возёсъёслэсь но ужбергатӥсьёслэсь выль емыш продукцизэс ӵектыны дась. Пыриськисьёс чебермам палаткаосын вуззэс возьматозы, соосты веръяны луонлык сётозы. «Паймымон емышъёс» адӟытон-вожвылъяськонэ бакча сиёнъёслэсь но емышъёслэсь аспӧртэм экземпляръёс, композициос но будосъёслэсь лэсьтэм киужъёс люкамын луозы.

Со сяна, эшъяськон возь вылын сям-йылол ӝукен гастрономической площадка, нылпиослы шудон программаос но концерт радъялозы. Куноос озьы ик калык инструментъёсъя, шудонъёсъя но эктонъёсъя мастер-классъёсы пыриськыны быгатозы. Ужрадэз аттракционъёс но вузкарон интыос узырмытозы.

Праздник удмурт калыклэсь духовно-нравственной дунлыкъёссэ утьыны но азинтыны, йӧскалык лулчеберетэз вӧлмытыны но егитъёсты историлэн кутсконаз кыскыны чакламын. Со улосвылкуспо но йӧскалык кусыпъёсты юнматэ, лулчеберет кылёсбурез утёнлы но огазеяськон мылкыдлы юрттэ — со тупа «Семья» йӧскалык ӵектослэн ужпумъёсызлы, кудзэ кунлэн Президентэз Владимир Путинлэн пуктэмезъя быдэсъяло.