2-тӥ южтолэзе Удмурт Элькунысь йӧскалык театрын вожвылъяськонлэн финалэз радъяськоз. Концертлэн пумаз шараямын луоз тужгес но устоез кылбурчи-крезьгурчи-кырӟась союз.

Ӵектос улсын егит кылбурчиос, крезьгурчиос но кырӟасьёс портэм жанрен удмурт кылын кырӟан гожто. Ужрадлэн валтӥсь мугез луэ творческой кусыпъёсты юнматон, быгатӥсь удмурт егитъёсты азинтон, егит кылбурчиослы, крезьгурчиослы но кырӟасьёслы асьсэды шедьтыны но возьматыны юрттон. Кырӟан бордын уж кыстӥське 7 толэзь. Та сезонэ уж 2015-тӥ арын куарусён толэзе кутскиз.

Тодады вайытыса вераломы, нырысетӥ сезонэвормисе потӥз Алексей Пикулев, кылем арын тужгес но устоез луиз Лиана Корепанова. Кырӟасьёслы вормемзы понна кузьым – кырӟанзыя клип лэсьтон, нош устоосыз кылбурчиослы (Михаил Михайлов и Марина Пахомова) – кылбур бичет поттон.

Проектлэн кык ар ужамезлэн емышез – удмурт кылын 30-лэсь трос выль кырӟанъёс. Егитъёслэн ужзылы вылӥ дунъет сёто литераторъёс но, крезьгурчиос но. Туэ удмурт кырӟан шыкыс узырмоз эшшо 10 кырӟанэн.

«Куарагур» крезьгуро ӵектосэз малпаз но 2013-тӥ арын Удмурт Элькунысь йӧскалык политикая министерстволэн юрттэменыз быдэстыны кутскиз удмурт егитъёслэн «Шунды» мерлыко огазеяськонзы.

Пыр-поч ивортодэт басьтыны луэ таӵе телефонъя: 8 904 837 14 33, (3412) 63-10-44 (Тронина Ольга Алексеевна).