16-тӥ толсуре Калыкъёслэн Эшъяськон юртазы «Возвращение к истокам» нимо элькун вожвылъяськонлэн финалэз ортчоз. Ужрадлэн валтӥсь меретъёсыз: пӧртэм калыкъёслэсь лулчеберетсэс утьыны луонлык кылдытон но сое Удмурт Элькунысь студентъёс пӧлын вӧлмытон.

«Возвращение к истокам» ӵектослэн валтӥсь малпанэз – удысужлы дышетон ужъюртъёсын шаертодонъя отрядъёс кылдытон, егитъёсты шаерез эскерон ужлы дышетон но элькунысьтымы гуртъёсы экспедицие потыса соослэсь эскерон ужзэс радъян. Финалын отрядъёс таӵе оръёсъя асьсэлэн эскерон ужъёссэс возьматозы: «Видеоролик», «Творческий отчет – презентация» (эскерем гуртын улӥсьёслэсь гожтэм сям-йылолъёссы вылэ инъяськыса лэсьтэмын), «Национальный обряд».

Та ӵектос нырысьсэ радъямын вал 2012-тӥ арын. Сое быдэстон улсын куинь ар куспын элькунысьтымы удысужлы дышетон ужъюртъёсын шаертодонъя 20-лэсь уно отрядъёс кылдытэмын, 30 пала гуртъёс эскеремын. Кылсярысь, таӵе гуртъёс вуылӥзы студентъёс: Перевозной чгт., Голлян чгт., Дэбес чгт., Быргында гт., Асан чгт., Балезино кгт., Каракулино чгт., Ува кгт., Дэри чгт., Ӵошкыт гт., Тыловай чгт., Выльгурт гт. (Сьолта ёрос), Гавриловка гт., Падера гт., Бадӟым Чепца гт., Кузебай гт., Ныргында гт., Саркуз гт., Брангурт гт., Пуро- Можга гт., Пичи Пурга чгт. но мукет.

Пусйымон луо таӵе лыдпусъёс но: 2013-2014-тӥ аръёсы ӵектосэ 7 команда пыриськиз, нош 2014-2015-тӥ аръёсы – 15 команда. Ужрадэ пыриськемъёслэн верамзыя, ӵектос туж кулэлыко луэ, угось луонлык кылдытэ портэм сям-йылолъёсын, калыкъёсын тодматскыны, шаерлэсь историзэ мургес тодыны.

Ӵектосэз радъяло: «Удмуртская организация Российского Союза Молодёжи» мерлыко огазеяськон, Калыкъёслэн Эшъяськон юртсы, Удмурт Элькунысь йӧскалык политикая министерстволэн но Удмурт Элькунысь физкультурая, спортъя но егитъёсын ужан политикая министерстволэн юрттэмзы улсын.