Тулыслэн нырысетӥ нуналъёсаз шаерамылэн котькудаз сямен сэрегаз ортчизы тол келянлы но тулыс пумитанлы сӥзем шулдыръяськонъёс.

Вӧй келянлы сӥзем элькун шулдыръяськон туэ ортчиз 2-тӥ южтолэзе Дэри черкогуртын. Удмурт Элькунысь йӧскалык политикая министерство, «Дэри ёрос» муниципал кылдытэт Администраци но Ӟуч лулчеберетъя огазеяськон кужымзэс ӵош карыса калыклы шулдыр праздник радъязы.

Ӵукнаысен ик кутскиз дасяськон. Вузчиос ӝӧкъёс вылэ тыризы товарзэс, сиёнэн вузкарисьёс дасязы самарзэс, пузэс, ужрадэз нуисьёс поттазы шудыны кулэ луись арбериоссэс но кузьымъёссэс, крезьгурчиос эскеризы инструментъёссэс. Каллен люкаськыны кутскизы куноос. Ураме вӧлдӥськиз ческыт зын! Чузъяськиз задор кырӟан! Шылдыръяськыны котькин дась!

Нырысь ик лыктэм калык пумитаз ёросъёсысь вуэм куноосты. Ёрос делегациос ваче ки кутскыса бергазы мунё котыртӥ. Мунё нош люкаськем калыклы, тулыс вуэмлы шумпотыса, лэся, кизэ чабиз.

Калыкез Вӧй келянэн ӟечкыланы лыктӥзы бадӟым куноос: Удмурт Элькун Тӧролэсь ужзэ огдырылы быдэсъясь А.В. Соловьёв, Удмурт Элькунысь Кун Кенешлэн Тӧроез В.П. Невоструев, Удмурт Элькунъя валтӥсь федерал инспектор Д.А. Мусин, Удмурт Элькунысь йӧскалык политикая министрлэсь ужзэ быдэсьясь Л.Н. Буранова, министрлэн воштӥсез О.В. Царегородцева, Удмурт Элькунысь ӟуч лулчеберетъя огазеяськонлэн кивалтӥсез С.С. Фефилов, «Единая Россия» партилэн исполкомезлэн кивалтӥсез А.И. Гальцин, Удмурт Элькунысь лулчеберетъя, печатья но ивортодэтъя министр В.М. Соловьёв, Удмурт Элькунысь егитъёслэн ужъёссыя министр Д.А. Логинов, Калыкъёслэн Эшъяськон юртсылэн кивалтӥсез А.В. Шуклин, «Кез ёрос» муниципал кылдытэтлэн Тӧроез П.Е. Князев. Котькудӥз вераз шуныт кылъёс, тау кариз шулдыръяськонэз радъясьёслы ӟеч мылкыд кузьмамзылы.

«Кез ёрос» муниципал кылдытэтлэн Тӧроез П.Е. Князев лыктэм куноосты ӟечкыламез бере «Дэри ёрос» муниципал кылдытэтлэн Тӧроезлы сётӥз Масленица мунёез, кудӥз Вӧй келян шулдыръяськонэн ӵош арысь аре мукет ёросэ выже.

Удмурт Элькунысь йӧскалык политикая министрлэсь ужзэ быдэсьясь Л.Н. Буранова вераз: «Туннэ шулдыр нунал – тулысэз пумитаськомы. Вӧй келян, мукет калык праздникъёс сямен ик, котькуд корка шумпотон вае. Туннэ но тани татын, Дэри ёросын, ӟучъёсын ӵош шулдыръясько, тулысэз пумитало пӧртэм калыкъёс. Та праздник калыкъёсты огазея. Та выллем шулдыръяськонъёс элькунамы тупаса улонэз пыӵато. Шуд но дэлет асьмен калыкъёсмылы, шаермылы!».

Праздникез азьланьтӥз «Масленичные смотрины» театр возьматон. Петрушка ёросъёсысь лыктэм выль кенъёс пӧлысь аслыз кышно утчаз.

Пӧртэм шудонъёсы пыриськыны луонлыкез вал котькуд лыктэм кунолэн. Лыктэмъёс кужымзэс но мертазы, валэн но вортылӥзы, калык эктонъёсты но тыпыртӥзы, жингрес кырӟанъёсты но гурлазы. Ӟеч мылкыд сяна шудӥсьёс пӧртэм кузьымъёс басьязы на.

Котькуд ёрос дасяськем та нуналлы. Кырӟанъя но эктонъя коллективъёс возьматӥзы асьсэлэсь быгатэмлыкъёссэс, шулдыртӥзы калыкез.

Сарапул ёросысь «Горлинка», Ува ёросысь «Лучинушка», Шаркан ёросысь «Околица» нылпи коллектив, ӟуч кырӟанъя «Лель» калык ансамбль, Дэри ёросысь «Реченька» но «Тӧдьы юсь» ансамбльёс, Кез ёросысь «Калининки» коллектив, Яр ёросысь «Надежда» ансамбль, Вотка ёросысь «Катюша» но «Вечера» ансамбльёс, Балезино ёросысь Сергино черкогуртысь лулчебертъя центрысь кырӟанъя но эктонъя ансамбль, Ижкарысь «Кукушка» коллектив, Грак ёросысь «Звонница» ансамбль но мукетъёсыз (огъя 32 коллектив) кузьмазы куноослы ӟеч мылкыд.

Программа йылпумъяськыку калык доры вуиз Тулыс. Со дэмлаз куро мунёез ӝуатыны. Угось калык верамъя, куро мунёез ӝуатыку, кайгуос но шугсекытъёс ӝуало, кошко пе. Котькуд мылкыд карись султӥз огъя круге, куро сульдэрез ӝуатӥзы «Уходи горе» кырӟанъя.

Вӧй келян шулдыръяськон удалтӥз шуыны луэ!