15-тӥкуарусён толэзе Ижкарысь Космонавтъёслэн парказы XV «Рыжий Фестиваль» ортчоз.

«Рыжий Фестиваль» 2004-тӥ арысен радъяське. Ужрадлэн инъетэз – удмуртъёслэн горд йырсиё луэмзы, та тодметсыя соос шаерамы гинэ ӧвӧл, быдэс дуннеын (ирландецъёсын ӵош) но нырысетӥ инты басьто.

2018-тӥ арны фестиваль сӥземын луоз элькунысьтымы но бускель улосъёсысь пӧртэм выжыысь калыкъёс пӧлысь горд йырсиё адямиосты огазеянлы.

10-тӥысен 14-тӥ куарусёнэ элькунысьтымы дышетскон ужъюртъёсын «Горд арня» ортчоз. Фестиваль улсын дышетскисьёс понна «Горд крезьгур», «Горд мылкыд», «Каун фонарик», «Горд вернисаж», «Горд шудон» творческой вожвылъяськонъёс радъямын луозы. «Горд арнялы» йылпумъянъёс лэсьтозы Фестивальын, 15-тӥ куарусёнэ. Та нуналэ «Голоса улиц» ӵектонэз быдэстӥсьёс спорт площадкаос радъялозы, ужалозы пӧртэм мастер-классъёс. Фестивальлэн валтӥсез ужрадэз самой горд йырсиё адямиез быръён луоз. Йылпумъяськоз фестиваль Ижкарысь коллективъёслэн концертэнызы но тыл шоуэн.