«Ёлка желаний» нимо ӟечлэсьтон акциын УЭ-ысь йӧскалык политикая министр Эдуард Петров бырйиз шар, кудаз Ижкарысь дас аресъем Мирон дышетскисьлэн льӧль малпан-куронэз гожтэмын. Мирон анаеныз ӵош «Гринфилд парк» оленефермае вуылыны малпа вал.

«Мирон – зэмос пичи путешественник, со яратэ выль интыос усьтыны. Со сяна, со туж яратэ пудо-животъёсты. Со понна туж бадӟым шуд соосын кусып возьыны, чакланы но киысь сюдыны. Пужейёс – паймымон но йӧно макеос», – мылкыдъёссэ вераз пияшлэн анаез Софья.

Мирон куинетӥ классэз витьёслы гинэ йылпумъяз, туэ со ньылетӥ классэ выжиз. Озьы ик со тунсыкъяське робототехникаен, программированиен но олимпиадной математикаен. Со сяна 3d-ручкаез тодматске, суредаське, англи кылэз дышетэ.

«Шумпотымон адӟыны, пиналъёслэн малпанъёссы сыӵе сюлмысь но огшорыесь шуыса. Соосты быдэстон – нимысьтыз шумпотон. Котькуд пинал выжыкыллы мед оскоз, нош ми солы быдэсмыны мед юрттомы», – пусйиз Эдуард Петров.

Тодэ вайытом, 1-тӥ инвожое элькун гужем акцилы кутскон сётӥз Удмуртилэн Тӧроез Александр Бречалов. Сое Удмурт Элькунысь нылпилэн эрикрадъёсызъя Ужоскето муртлэн Аппаратэз ньылетӥ ползэ ортчытэ. Акция секыт югдуре шедем семьяосысь нылпиослэсь, нимысьтыз ожгар ужрадэ пыриськисьёслэн семьяоссылэсь, анай-атайтэк кылем но инвалид нылпиослэсь, озьы ик таланто пиналъёслэсь мылкыдъёссэс быдэстон вылысь радъяське.