3-6-тӥ толшоре «Ёлочка» лагере Удмуртиысь, Башкортостанысь но Татарстанысь 40 пиналъёс шутэтскыны но ас ӵектосъёссэс эскерыны вуылӥзы. Смена 3 ӧръя нуиськиз: ӵектос кылдытон (проектирование), ужбергатон (предпринимательство) но ас луонлыкъёстэ будэтон (личностный рост). «Вамыш»-лэн пыриськисьёсыз – со 9-11-тӥ классъёсысь дышетскисьёс но 1-2-тӥ курсъёсысь студентъёс. Радъясьёс – удмурт егитъёслэн «Шунды» огазеяськонзылэн ёзчиосыз.

Нуналлы быдэ лагере пӧртэм удысъёсысь спикеръёс вуылӥзы, асьсэ тодон-валанэнызы удмурт егит азьмынӥсьёсты тодматӥзы. Соос пӧлын психолог, режиссёр но мерлык ӵектосъёс кылдытӥсь Лариса Ускова, «Эктоника» йӧскалык проектэз кылдытӥсь Владислав Горжак, «Удмуртолэнд» книгалэн авторез Пелагея Куликовская, Fashion Studio дизайн школалэн кивалтӥсез, дышетӥсь но этнодизайнер Надежда Николаева.

Егитъёс ас ӵектосъёссэс кылдытъязы, кудъёсыз азьланяз улонэ пыӵатэмын луозы. Сменаын кусып возён, ужан но вераськон удмурт кылын ортчиз.

«Нылпиос шоры, соослэн ӝуась синъёссы но ӵектосъёссы шоры учкиськод ке, валаськод: удмурт лулчеберет одӥг интыяз уг сылы, со азьлантӥське, пиналъёсын ӵош вамышъя. Мон малпасько, та басьтэм тодон-валанъёссы соослэсь улонзэс воштозы», – вераз «Вамыш» дышетон сменалэн кивалтӥсез, удмурт егитъёслэн «Шунды» огазеяськонзылэн ёзчиез Мария Лекомцева.