20-22-тӥ куарусёнэ Ханты-Мансийск автоном округлэн кивалтэтэз, финн-угор писательёсты ӧтьыса, Россиякуспо конференция радъялоз.

Конференция огазеялоз литераторъёсты, литература, кыл, этнография, книгапоттонни удысысь тодосчиосты, лыдӟетъюртъёсысь, дышетон ужъюртъёсысь ужасьёсты но кылысь кылэ берыктӥсьёсты. Соос пыр-поч эскерозы финн-угор литератураысь сюлмаськытӥсь юанъёсты.

Егит гожъяськисьёслы дышетскон блокъёс ортчытэмын луозы. Та ӧнеръя вуоно усточиос творческой семинаръёсы, лекциосы, книгапоттонъя, краудфандингъя, туала литератураез вӧлмытонъя, астэ возьматонъя но ас кужмыныд гожтэмдэ печатлонъя мастер-классъёсы пыриськозы. Нылпи программа улсын Финн-угор медиашкола но егит авторлэн мастерскоез ужалозы. Лыктэм куноосты возьмалозы книгаосын тодматскон, авторъёсын пумиськонъёс, «Финн-угор книгалэн дуннеез» адӟытон но трос мукетъёсыз.

Озьы ик, конференциен валче Ханты-Мансийскын «Литературная газета» газетлэн нуналъёсыз пусйиськозы. Егит авторъёслэн луонлыксы кылдоз XIX Россиякуспо «Мцыри» фестивальлэн быръён тураз пыриськыны.

Конференция сярысь пыр-почгес тодыны но меӵак эфирез учкыны порталын луоз.